Трэнер па біятлоне Альберс паскардзіўся на “архіскладаную” сітуацыю ў зборнай праз санкцыі
5 студзеня, Позірк. “Архіскладанай” назваў сітуацыю з імпартным інвентаром у зборнай па біятлоне заслужаны трэнер Беларусі Юрый Альберс.
“З нагоды зброі… Як аўтамабілісты праходзяць тэхабслугоўванне аўтамабіля, раней мы штогод гэтак жа рабілі і са зброяй. [Абслугоўвалі яе] або на фабрыцы, або на фірме ў Аўстрыі, на якой правяралі вінтоўкі. Гэтага ў нас ужо няма тры сезоны, а ў зброі ёсць свой ліміт на колькасць стрэлаў”, — цытуе Альберса сайт sport5.by.
“Складаным пытаннем”, паводле яго слоў, з’яўляецца закупка патронаў: “Забарона ёсць усюды, і ні з якога боку да гэтага не падабрацца. На гэты сезон мы яшчэ нашы запасы збярэм, але ўжо вельмі складана”.
“Увесь інвентар, які ў нас цяпер ёсць, трэба паставіць у бок. Усе чахлы, сумкі, скрыні — усё гэта трэба прыбіраць, таму што мае фторзмяшчальныя кампаненты, якія забароненыя [у ЕС па меркаваннях экалогіі]”, — адзначыў трэнер.
Пры гэтым з яго слоў вынікае, што беларускі бок прадпрымае спробы абыходу санкцый.
“Мы працуем над гэтым, — заявіў Альберс. — Федэрацыя біятлона і Міністэрства спорту ідуць насустрач. Рознымі шляхамі, не буду распавядаць якімі, але мы спрабуем набываць інвентар. Праца тут вядзецца. Думаю, што будзем гатовыя да таго моманту, калі нас дапусцяць [да міжнародных спаборніцтваў]”.
Беларускія спартсмены з 2022 года адхіленыя ад спаборніцтваў пад эгідай Міжнароднага саюза біятланістаў (IBU). 28 верасня 2024 года стала вядома пра падаўжэнне гэтай забароны яшчэ на адзін сезон. Адхіленне таксама дзейнічае ў дачыненні да беларускіх лыжнікаў, гарналыжнікаў, фрыстайлістаў і сноўбардыстаў.
20 снежня Міжнародны саюз канькабежцаў дазволіў нейтральным атлетам з Беларусі ўдзельнічаць у адборы на Алімпіяду, прыняўшы шэраг абмежаванняў.
Зімовыя Алімпійскія гульні пройдуць з 6 па 22 лютага 2026 года ў Мілане і Корціна-д’Ампеца ў Італіі.
28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартовыя федэрацыі не дапушчаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”.
28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.
На летняй Алімпіядзе-2024 у Парыжы абмежаваную колькасць беларускіх атлетаў, якія выступалі ў нейтральным статусе, заваявалі чатыры медалі — залаты, два сярэбраныя і бронзавы, заняўшы віртуальнае 50-е месца ў агульным заліку.