У 2018–2023 гадах Беларусь пакінула больш за 210 тыс. працаздольных грамадзян — “Кіберпартызаны”
8 студзеня, Позірк. З 2018 года да 2023-га Беларусь пакінула 211.286 грамадзян працаздольнага ўзросту, вынікае са статыстыкі групы ананімных хакераў, аб’яднаных у ініцыятыву “Кіберпартызаны”.
Паводле наяўных даных, у 2018 годзе з Беларусі з’ехалі 26.222 чалавекі працаздольнага ўзросту, 2019-м — 27.299, 2020-м — 25.430, 2021-м — 35.432, 2022-м — 52.635, 2023-м — 44.268.
Адзначаецца, што інфармацыя атрыманая “па адрасах рэгістрацыі/пражывання ўнутры краіны, а таксама па выездах з Беларусі на ПМЖ”.
У выбарку ўключаны грамадзяне працаздольнага ўзросту, якія на працягу аднаго каляндарнага года звольніліся, пакінулі Беларусь і не вярнуліся ў краіну, гаворыцца ў паведамленні.
Падкрэсліваецца, што ў статыстыку не ўключаныя непаўналетнія, пенсіянеры, а таксама шэраг катэгорый працаздольнага ўзросту. Гаворка пра грамадзян, якія звольніліся, але не пакінулі Беларусь у тым жа годзе; якія працавалі неафіцыйна або па грамадзянска-прававых дагаворах; якія выехалі, але прыязджалі ў Беларусь у тым жа годзе; якія пакінулі Беларусь, але працягвалі працаваць на беларускага працадаўцу; тых, хто выехаў не праз афіцыйныя пункты пропуску (напрыклад, у Расію).
“Рэжым імкнецца пайменна весці спісы айцішнікаў і медработнікаў, якія выехалі. Таксама рэгулярна падводзяць статыстыку, колькі ў Беларусі засталося працуючых у сферы IT, медыцыны, будаўніцтва, перавозак. Падобна на тое, моцна турбуе прыкарытнікаў сітуацыя ў гэтых галінах”, — адзначаецца ў паведамленні ініцыятывы.
Як паведамляў “Позірк”, за апошні год Беларуская эканоміка страціла 20 тыс. работнікаў. У лістападзе 2024-га на рынку працы было занята 4 млн 120,5 тыс. чалавек — на 0,07% больш, чым у кастрычніку (4 млн 117,5 тыс.; +0,21%) і на 0,48% менш, чым год таму (4 млн 140,5 тыс.).
Не дапускаць адтоку эканамічна актыўнага насельніцтва з рэгіёнаў цяпер з’яўляецца “задачай нумар адзін”, заявіў Аляксандр Лукашэнка 16 лістапада ў Клімавічах (Магілёўская вобласць) на абласным свяце “Дажынкі”.
Пры гэтым ён адзначыў, што “працаваць жадаюць далёка не ўсе”, і папярэдзіў: “Рыхтуйцеся, бамжоў, дармаедаў у краіне не будзе, усе павінны варушыцца, працаваць, зарабляць на сябе і сваю сям’ю”. “Мы дапаможам, дамо працоўнае месца, толькі ідзіце працаваць. Тыя, хто перашкаджаюць людзям жыць… хлопцы, мы з вамі будзем сур’ёзна разбірацца, не крыўдуйце”, — заявіў спікер.
29 кастрычніка Лукашэнка падпісаў указ № 402 “Аб сацыяльнай падтрымцы”. Дакумент прыняты “ў мэтах узмацнення сацыяльнай падтрымкі асобных катэгорый грамадзян”. Указам прадугледжваецца “адмена абмежавання на памер пенсіі працуючым пенсіянерам, што дасць магчымасць павысіць эфектыўнасць выкарыстання на рынку працы асоб пенсійнага ўзросту”.
Каля 10 тыс. пенсіянераў могуць вярнуцца на рынак працы пасля зняцця абмежаванняў памеру пенсій для працуючых пенсіянераў, паведаміла 3 лістапада ў эфіры тэлеканала “Беларусь 1” міністр працы і сацыяльнай абароны Наталля Паўлючэнка.
Паводле слоў міністра, гаворка пра “маладых пенсіянераў”, якія “пяць гадоў як выйшлі на пенсію і не працуюць”, для якіх “такое абмежаванне [па памеры пенсій] цяпер спрацоўвае”.
У Беларусі менш за 8,8 млн жыхароў, вынікае з дакумента КДК
Апублікавана на адкрытай версіі "Позірку" 31 снежня 2024 года ў 18:58 31 снежня, Позірк. У Беларусі цяпер пражывае менш за 8,8 млн чалавек, вынікае са службовага ліста намесніка старшыні Камітэта дзяржкантролю Станіслава Наркевіча Савету міністраў. Копію дакумента, складзенага ў лістападзе …