У дзяржарганізацыях вызначаць адказных за “фармаванне канструктыўнай грамадскай думкі”

9 студзеня, Позірк. У дзяржаўных органах і дзяржарганізацыях вызначаць работнікаў або структурныя падраздзяленні, адказныя за рэагаванне на “грамадска значную інфармацыю”, вынікае з пастановы Савета міністраў № 1039 ад 30 снежня 2024 года.

Дакументам, апублікаваным на Нацыянальным прававым інтэрнэт-партале 9 студзеня, зацверджана “Палажэнне аб парадку і тэрмінах рэагавання на грамадска значную інфармацыю”.

У адпаведнасці з гэтым палажэннем асноўнай задачай згаданых адказных асоб або аддзелаў стане “арганізацыя працы па фармаванні канструктыўнай грамадскай думкі; умацаванне іміджу дзяржаўных органаў, дзяржаўных арганізацый; удасканаленне форм зваротнай сувязі з грамадзянамі і юрыдычнымі асобамі; супрацьдзеянне распаўсюду недакладнай грамадска значнай інфармацыі; растлумачэнне прымянення нарматыўных прававых актаў”.

Адказныя за рэалізацыю гэтых задач павінны “прымаць меры рэагавання ў дачыненні да грамадска значнай інфармацыі, у тым ліку недакладнай; фармаваць пералік магчымых інфаповадаў; вызначаць парадак узаемадзеяння са СМІ”. Яны “выяўляюць прычыны, якія садзейнічаюць узнікненню праблем, што ўтрымліваюцца ў грамадска значнай інфармацыі”, вызначаюць, у якіх дзяржаўных медыярэсурсах публікаваць “інфармацыйныя паведамленні ў дачыненні да грамадска значнай інфармацыі”.

“На працягу гадзіны ад моманту прыняцця кіраўніком дзяржаўнага органа рашэння аб аднясенні сацыяльна-эканамічных і грамадска-палітычных праблем да вострых дзяржаўны орган, дзяржаўная арганізацыя ажыццяўляюць размяшчэнне інфармацыйнага паведамлення, што ўтрымлівае інфармацыю пра вострыя сацыяльна-эканамічныя і грамадска-палітычныя праблемы, на дзяржаўным інтэрнэт-рэсурсе і (або) на афіцыйным сайце дзяржаўнага органа, дзяржаўнай арганізацыі”, — гаворыцца ў дакуменце.

Адметна, што палажэнне ў якасці “меры рэагавання” дазваляе не разглядаць грамадска значную інфармацыю (за выключэннем крытычных матэрыялаў), калі трэба пазбегнуць “штучнага прыцягнення грамадскай увагі да грамадска значнай інфармацыі; узнікнення рэпутацыйных рызык для дзяржаўных органаў, дзяржаўных арганізацый, іх службовых асоб”, а таксама пры наяўнасці інфармацыі, “распаўсюд якой здольны нанесці шкоду нацыянальным інтарэсам”.

Варта адзначыць, што пералічаныя функцыі перасякаюцца з задачамі ідэолагаў і адказных за працу са СМІ. Якая-небудзь з гэтых штатных адзінак маецца ў кожнай дзяржарганізацыі.