9 студзеня, Позірк. Інструкцыі для “беларускага бізнесу і беларусаў, якія хочуць пачаць прадпрымальніцкую дзейнасць” у Польшчы, а таксама інфармацыю пра варыянты падтрымкі апублікуе Міністэрства развіцця і тэхналогій гэтай краіны, паведаміў “Позірку” галоўны дарадца Святланы Ціханоўскай Франак Вячорка.
Паводле яго слоў, пра гэта было заяўлена 9 студзеня ў Варшаве на сустрэчы Ціханоўскай і намесніка кіраўніка Аб’яднанага пераходнага кабінета, кіраўніка Народнага антыкрызіснага ўпраўлення Паўла Латушкі з профільным польскім міністрам Кшыштафам Пашыкам.
Бакі абмеркавалі “пытанні падтрымкі Польшчай беларускай дэмакратычнай супольнасці, бізнесу і беларусаў, якія знайшлі прытулак у гэтай дзяржаве”. Цяпер, паведаміў Вячорка, у Польшчы зарэгістравана больш як 18 тыс. прадпрымальнікаў і кампаній з беларускімі ўладальнікамі.
