Перыяд выступаў кандыдатаў у прэзідэнты па ТБ і радыё завершаны
17 студзеня, Позірк. Перыяд выступаў кандыдатаў на пасаду прэзідэнта па тэлебачанні і на радыё завяршыўся 17 студзеня. Апошнімі свае звароты да грамадзян зачыталі ў радыёэфіры лідар Ліберальна-дэмакратычнай партыі Беларусі Алег Гайдукевіч і старшыня Рэспубліканскай партыі працы і справядлівасці Аляксандр Хіжняк.
Кожны кандыдат меў права на два паўгадзінныя радыё- і два паўгадзінныя тэлевыступы. З пяці ўдзельнікаў выбарчай кампаніі гэтай магчымасцю не скарыстаўся толькі Аляксандр Лукашэнка.
Усе чатыры разы Хіжняк агучваў адны і тыя ж тэзісы сваёй праграмы, на што ў яго сышло прыкладна па 11 хвілін эфірнага часу.
Былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая таксама паўтарылася чатыры разы. Кожны раз яна зачытвала сваю праграму на беларускай і рускай мовах.
Гайдукевіч і старшыня Камуністычнай партыі Беларусі Сяргей Сыранкоў мелі па два варыянты выступу.
Сёмыя прэзідэнцкія выбары ў Беларусі прызначаныя на 26 студзеня 2025 года (датэрміновае галасаванне — 21–25 студзеня).
Прэзідэнцкая кампанія праходзіць пад поўным кантролем уладаў. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі.
З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.
