Працэс вызвалення палітвязняў са “спісу 250” яшчэ працягваецца

Апублікавана на адкрытай версіі “Позірку” 24 сакавіка 2026 года ў 19:48

24 сакавіка, Позірк. Паводле звестак “Позірку”, працэс вызвалення палітвязняў са “спісу 250” яшчэ не завершаны, афармленне дакументаў працягваецца.

Згодна з інфармацыяй крыніцы, тыя, хто знаходзіўся ў папраўчых установах адкрытага тыпу (пакаранне ў выглядзе абмежавання волі), даведаліся пра сваё вызваленне са спісаў у інтэрнеце, а само вызваленне адбылося на наступны дзень, 20 сакавіка.

У выніку сустрэчы з амерыканскай дэлегацыяй 19 сакавіка ў Мінску Аляксандр Лукашэнка памілаваў 250 вязняў, з якіх 235 дазволена застацца на радзіме, а 15 былі вывезеныя ў Літву (трое пасля накіраваліся ў Польшчу). У адказ адміністрацыя прэзідэнта ЗША Дональда Трампа паабяцала зняць яшчэ частку санкцый (з “Белінвестбанка”, Банка развіцця, Міністэрства фінансаў, “Беларуськалія”, Беларускай калійнай кампаніі).

Як паведаміў праваабарончы цэнтр “Вясна”, упершыню за чатыры гады ў краіне менш за 900 палітвязняў. Пры гэтым рэпрэсіі ў краіне не спыняюцца, канстатуецца ў паведамленні.

“У бліжэйшыя дні будуць прынятыя новыя заявы па палітвязнях, таму без спынення рэпрэсій лічба палітвязняў, на жаль, будзе толькі павялічвацца”, — падкрэсліла “Вясна”.