На выбары-2025 акрэдытавана каля 44 тыс. нацыянальных назіральнікаў

22 студзеня, Позірк. Выбарчыя камісіі розных узроўняў акрэдытавалі 44.361 нацыянальнага назіральніка за арганізаванымі рэжымам Аляксандра Лукашэнкі прэзідэнцкімі выбарамі, вынікае з даных Цэнтрвыбаркама.

З 17 студзеня іх колькасць вырасла на 6.601 (+17,5%; было 37.760).

Грамадскія арганізацыі прадстаўляюць 30.138 назіральнікаў (67,9%), іх колькасць за справаздачны перыяд вырасла на 19,3% (было 25.268). Гэта члены:

• прафесійных саюзаў са структуры Федэрацыі прафсаюзаў Беларусі — 8.957 (29,7% усіх прадстаўнікоў грамадскіх аб’яднанняў, 20,2% нацыянальных назіральнікаў; колькасць з 17 студзеня вырасла на 22,4%, было 7.319);
• Беларускага рэспубліканскага саюза моладзі — 4.546 (15,1%, 10,3%; +16,2%, 3.914);
• ГА “Белая Русь” — 4.469 (14,8%, 10,1%; +15,1%, 3.882);
• Беларускага грамадскага аб’яднання ветэранаў — 4.340 (14,4%, 9,8%; +19,6%, 3.628);
• Беларускага саюза жанчын — 4.211 (14%, 9,5%; +16,6%, 3.611);
• іншых аб’яднанняў — (12%, 8,2%; +24,1%, 2.914).

У траўні 2023 года Міністэрства юстыцыі вызначыла названыя арганізацыі “суб’ектамі грамадзянскай супольнасці”, якія маюць права на “ўзаемадзеянне з дзяржаўнымі органамі ў асаблівых формах”.

У якасці назіральнікаў акрэдытаваны 4.901 член палітычных партый (11,1% нацыянальных назіральнікаў; з 17 студзеня колькасць вырасла на 9,8%, было 4.464). Гэта прадстаўнікі:

• партыі “Белая Русь” — 2.626 (53,6% назіральнікаў ад партый, 5,9% нацыянальных назіральнікаў; за справаздачны перыяд колькасць вырасла на 11,1%, была 2.364);
• Камуністычнай партыі Беларусі (КПБ) — 1.232 (25,1%, 2,8%; +7,9%, 1.142);
• Рэспубліканскай партыі працы і справядлівасці (РППС) — 679 (13,9%, 1,5%; +8,5%, 626);
• Ліберальна-дэмакратычнай партыі Беларусі (ЛДПБ) — 364 (7,4%, 0,8%; +9,6%, 332).

Гэта ўсе партыі, якія засталіся пасля праведзенай улетку і ўвосень 2023 года зачысткі палітычнага поля Беларусі. Усе яны лаяльныя да рэжыму Лукашэнкі.

Акрамя таго, у якасці назіральнікаў зарэгістраваныя асобныя грамадзяне, што падалі адпаведную заяву, — 5.060 (11,4% нацыянальных назіральнікаў; рост на 12,8%, было 4.488), а таксама вылучэнцы працоўных калектываў — 4.262 (9,6%; +20,4%, 3.540).

Колькасць акрэдытаваных міжнародных назіральнікаў з 17 студзеня не змянілася — 445. З іх дзве траціны з’яўляюцца прадстаўнікамі постсавецкіх інтэграцыйных структур.

Датэрміновае галасаванне на выбарах-2025 пачалося 21 студзеня. ЦВК адрапартаваў, што на ўчасткі з’явілася 7,81% выбаршчыкаў — рэкорд для першага дня датэрміновага галасавання ў рамках выбарчых кампаній у Беларусі.

Асноўны дзень галасавання — 26 студзеня.

Цяперашняя прэзідэнцкая кампанія праходзіць пад поўным кантролем уладаў. Палітычнае поле краіны цалкам зачышчанае ад актыўных апанентаў Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца, “спецаперацыяй па ўтрыманні ўлады”, праваабаронцы кажуць пра імітацыю канкурэнцыі.

Апрача Лукашэнкі кандыдатамі на пасаду прэзідэнта зарэгістраваныя лідары трох праўладных партый — Алег Гайдукевіч (ЛДПБ), Сяргей Сыранкоў (КПБ) і Аляксандр Хіжняк (РППС). Яшчэ адзін кандыдат — былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года Ганна Канапацкая, якая пазіцыянуе сябе як “дэмакратычную альтэрнатыву”, аднак крытыкуе не Лукашэнку, а яго апанентаў, якія знаходзяцца ў турме або за мяжой.

З 1996 года ніводная выбарчая кампанія ў Беларусі не была прызнана незалежнымі назіральнікамі транспарэнтнай і адпаведнай дэмакратычным стандартам.