Другія суткі запар на пажарах гіне тры чалавекі

29 студзеня, Позірк. За мінулыя дзяжурныя суткі (з 06:00 28 студзеня па 06:00 29 студзеня) на пажарах у Беларусі загінула тры чалавекі, вынікае з аператыўнай зводкі Міністэрства па надзвычайных сітуацыях.

Трагедыі адбыліся ў Маладзечанскім і Нясвіжскім раёнах Мінскай вобласці, а таксама ў Касцюковіцкім раёне Магілёўскай вобласці.

У папярэдняй сутачнай зводцы МНС таксама паведамлялася аб гібелі на пажарах трох чалавек.

Пра першы сёлета пажар у экасістэме ўвечары 28 студзеня паведаміла прэс-служба Міністэрства лясной гаспадаркі. Паводле звестак ведамства, у Драгічынскім раёне (Брэсцкая вобласць) гарэла багністая мясцовасць на тэрыторыі рэспубліканскага ландшафтнага заказніка “Званец”.

“Тушэнне пажару абцяжарана адсутнасцю пад’язных шляхоў і забалочанай мясцовасцю. Пагрозы населеным пунктам няма, разам з тым адлегласць да дзяржлесфонду складае каля 2–3 кіламетраў”, — адзначаў Мінлясгас.

Усяго, паводле звестак МНС, за мінулыя суткі адбылося 10 пажараў, з пачатку года — 478 (за аналагічны перыяд 2023-га — 535; -10,7%), загінуў 71 чалавек (80; -11,3%).