Польскі вайсковец скончыў жыццё самагубствам на мяжы з Беларуссю

2 лютага, Позірк. Пра суіцыд польскага салдата на мяжы з Беларуссю паведаміла ў сацсетцы Х аператыўнае камандаванне родаў войск Узброеных сіл Польшчы.

“З глыбокім жалем паведамляем, што сёння ноччу ў раёне правядзення аперацыі “Бяспечнае Падляшша” адбылося самагубства аднаго з вайскоўцаў… Абставіны трагічнай падзеі расследуе вайсковая паліцыя пад наглядам пракуратуры”, — гаворыцца ў паведамленні.

З 1 жніўня 2024-га польская армія праводзіць аперацыю “Бяспечнае Падляшша”, у рамках якой для садзейнічання памежнікам, якія ажыццяўляюць ахову мяжы з Беларуссю, накіравана некалькі тысяч вайскоўцаў.

Летась 13 чэрвеня на польска-беларускай мяжы пачала дзейнічаць буферная зона (11 верасня тэрмін яе дзеяння быў працягнуты на чарговыя 90 дзён, 10 снежня — яшчэ на 90). Польскія ўлады спачатку рапартавалі, што са з’яўленнем буфера плыні нелегалаў значна скараціліся, аднак 26 верасня віцэ-прэм’ер — міністр нацыянальнай абароны Уладзіслаў Касіняк-Камыш заявіў пра ўзмацненне ціску на мяжы.

6 чэрвеня 2024 года стала вядома пра смерць вайскоўца 1-й танкавай брыгады Матэвуша Сітэка, параненага на мяжы з Беларуссю. Паводле інфармацыі Памежнай аховы Польшчы, ён зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.