Беларусь і расійскі Башкартастан абавязаны нарасціць тавараабарот — Лукашэнка

7 лютага, Позірк. Беларусь і Башкартастан “проста абавязаныя” ў 2025 годзе нарасціць тавараабарот і “перасягнуць 315–320 мільёнаў долараў”, заявіў Аляксандр Лукашэнка 7 лютага ў Мінску на сустрэчы з кіраўніком гэтага расійскага рэгіёну Радзіем Хабіравым.

Палітык, словы якога прыводзіць яго прэс-служба, адзначыў, што Мінск і Уфа “крыху збавілі абароты летась”, “недзе на 5–6% у тавараабароце знізілі”.

Лукашэнка згадаў пра сумесную працу Беларусі і Башкартастана “ў галіне беспілотнікаў для аграпрамысловага комплексу” і прапанаваў “працягваць і пашыраць” узаемадзеянне: “Досвед маецца, напрацоўкі пэўныя маюцца. Рынак сёння добры. Думаю, трэба рухацца ў гэтым кірунку”.

Кіраўнік расійскага рэгіёну па выніках сустрэчы паведаміў дзяржСМІ, што на перамовах з Лукашэнкам таксама абмяркоўвалася ідэя стварэння “башкірска-беларускага інвестыцыйнага кластара”.

“Гэта новая эканамічная з’ява. Для гэтага неабходна змяненне заканадаўства Расійскай Федэрацыі. Мы заканадаўчую ініцыятыву падрыхтавалі”, — заявіў Хабіраў, дадаўшы, што ў гэтым пытанні прадстаўнікі суб’екта РФ “знайшлі падтрымку” Лукашэнкі.

Кіраўнік Башкартастана патлумачыў, што пад кластар плануецца выдзеліць тэрыторыю з пэўным прэферэнцыйным статусам, “пачынаючы з ільготы па ўтыльзборы”.

“Прэферэнцый нават больш, чым у звычайнай асаблівай эканамічнай зоне, якія маюцца ў Расійскай Федэрацыі. Тэрыторыя дастаткова вялікая, там могуць размясціцца пяць тэхнапаркаў. Каб людзі там працавалі, мы нават думалі пра сумеснае будаўніцтва арэнднага жылля. Але паколькі гэтая прапанова з удзелам замежнага прадстаўніка, для гэтага неабходна змяніць федэральнае заканадаўства — тое, чым мы цяпер займаемся”, — паведаміў ён.

Прэм’ер-міністр Раман Галоўчанка наведваў Башкартастан летась у жніўні. Гэта быў другі ў 2024 годзе візіт Галоўчанкі ва Уфу, папярэдні быў у лютым.

Беларускі прэм’ер таксама наведваў Башкартастан у кастрычніку 2023 года.