За суткі паблізу мяжы з Літвой затрымалі чацвярых грамадзян з беспілотнікамі
8 лютага, Позірк. Чацвярых грамадзян з беспілотнымі лятучымі апаратамі затрымалі 5 лютага ў Гродзенскай вобласці — у пагранічнай зоне на мяжы з Літвой, паведаміла 8 лютага прэс-служба Дзяржаўнага пагранічнага камітэта.
Аднаго з іх, як адзначаецца, затрымалі ў аграгарадку Трабы (Іўеўскі раён) “пры сілавой падтрымцы АМАП УУС Гродзенскага аблвыканкама”. У яго доме знайшлі два беспілотнікі, чатыры пульты дыстанцыйнага кіравання, 25 акумулятарных батарэй да іх, зарадныя станцыі, камплектуючыя да дрона і планшэт.
Праз некалькі гадзін каля хутара Альтарыя (той жа раён) у мясцовага жыхара знайшлі беспілотнік, камплектуючыя і прыбор начнога бачання.
У вёсцы Свентаянск (Гродзенскі раён) пагранічнікі выявілі двух грамадзян з беспілотнікам мультыратарнага тыпу, пультам кіравання і акумулятарамі, радыёстанцыяй і цеплавізарам. Мужчыны паспрабавалі ўцячы, але беспаспяхова. Яны змешчаныя ў ізалятар часовага ўтрымання Гродзенскай пагрангрупы.
“У дачыненні да ўсіх затрыманых распачаты адміністрацыйны працэс за парушэнне пагранічнага рэжыму, — гаворыцца ў паведамленні. — Двое з іх таксама будуць прыцягнутыя да адказнасці за непадпарадкаванне законным патрабаванням супрацоўнікаў органаў пагранслужбы. Пасля высвятлення ўсіх абставін дзеянням мужчын будзе дадзеная прававая ацэнка”.
Апошнім часам дроны і аэрастаты актыўна выкарыстоўваюць кантрабандысты, каб нелегальна дастаўляць у Літву грузы, у асноўным цыгарэты беларускай вытворчасці.
1 красавіка 2024 года набыў моц указ № 297 “Аб дзяржаўным уліку і эксплуатацыі грамадзянскіх беспілотных лятучых апаратаў”, які забараняе ўвоз, захоўванне, абарот, эксплуатацыю і выраб беспілотнікаў і выкарыстанне паветранай прасторы без належнага дазволу.
Акрамя таго, за “незаконнае ўтрыманне і выкарыстанне беспілотнікаў у пагранічнай зоне або пагранічнай паласе” прадугледжана адміністрацыйная адказнасць паводле арт. 24.19 КаАП — штраф да 50 базавых велічынь (да 2.100 рублёў).
