ЕС не збіраецца прызнаваць Лукашэнку — Ціханоўская пасля сустрэчы са старшынёй Еўрапейскага савета

10 лютага, Позірк. Еўрапейскі саюз не збіраецца прызнаваць Аляксандра Лукашэнку пасля “рытуалу самапрызначэння”, які беларускі рэжым правёў два тыдні таму, і працягне падтрымліваць дэмакратычныя сілы.

Такую пазіцыю, паводле слоў беларускага дэмакратычнага лідара Святланы Ціханоўскай, данёс да яе старшыня Еўрапейскага савета Антоніу Кошта падчас праведзенай 10 лютага сустрэчы ў Бруселі.

Кошта таксама “запэўніў, што пазіцыя ЕС застаецца прынцыповай і нязменнай: палітвязні павінны быць вызваленыя, рэпрэсіі — спыненыя, а Беларусь павінна спыніць удзел у агрэсіі супраць Украіны. Еўрасаюз пастаянна даносіць гэтыя патрабаванні і да афіцыйнага Мінска”, сказала Ціханоўская ў відэакаментары па выніках перамоваў.

Паводле яе слоў, Кошта падкрэсліў, што рэгулярна падымае пытанне Беларусі на міжнародных форумах, паколькі гэта пытанне не толькі дэмакратыі і правоў чалавека, але і бяспекі Еўрапейскага саюза.

Ціханоўская адзначыла, што вызваленне палітвязняў “было і застаецца прыярытэтам“, і выказала меркаванне, што можна зрабіць больш у гэтым кірунку “праз ААН, таму што гэтае пытанне не толькі палітычнае, але і гуманітарнае“. “Нам неабходныя сумесныя намаганні міжнароднай супольнасці”, — падкрэсліла яна.

“У Брусэлі цяпер шмат кажуць пра мірныя перамовы па Украіне, а таксама пра адносіны з новай адміністрацыяй ЗША. І цяпер, калі ў свеце адбываецца столькі падзей, у ім столькі нявызначанасці, для нас важна, каб пытанне Беларусі заставалася ў фокусе“, — сказала дэмлідар.

Паводле інфармацыі галоўнага дарадцы Ціханоўскай Франака Вячоркі, бакі абмеркавалі таксама працяг працы ў рамках Кансультатыўнай групы ЕС — Беларусь.

На электаральнай працэдуры, якую Мінск лічыць “прэзідэнцкімі выбарамі”, за Лукашэнку афіцыйна прагаласавала 86,82% выбаршчыкаў. Канчатковы вынік, які супадае з папярэднім, быў абвешчаны 3 лютага на пасяджэнні Цэнтральнай выбарчай камісіі.

Электаральная працэдура прайшла пад поўным кантролем уладаў і на фоне беспрэцэдэнтнага ўзроўню рэпрэсій.

Вярхоўны прадстаўнік Еўрасаюза па замежных справах і палітыцы бяспекі Кая Калас і камісар па пытаннях пашырэння ЕС Марта Кос адзначылі 26 студзеня ў сумеснай заяве, што выбары ў Беларусі “пазбаўленыя ўсякай легітымнасці”.

Аб непрызнанні “фіктыўных выбараў” у Беларусі заявілі шэраг краін Еўрасаюза, Вялікабрытанія, Канада, Аўстралія, Новая Зеландыя, Украіна, Малдова.

Перад сустрэчай з Антоніу Коштай дэмлідар сустрэлася з прэзідэнтам Еўрапарламента Рабертай Метсола.