Ціханоўская заклікала французскіх парламентарыяў дамагацца вызвалення палітвязняў у Беларусі

11 лютага, Позірк. Дамагацца вызвалення палітычных зняволеных у Беларусі заклікала дэпутатаў французскага парламента дэмакратычны лідар Святлана Ціханоўская.

Пра сустрэчы, што адбыліся ў Парыжы, “Позірку” паведаміў галоўны дарадца палітыка Франак Вячорка.

Паводле яго слоў, 11 лютага ў межах форуму AI Action Summit Ціханоўская сустрэлася са спікерам Нацыянальнага сходу Францыі Яэль Браўн-Півэ, дэпутатамі парламента, а таксама з прадстаўнікамі групы “За дэмакратычную Беларусь” у заканадаўчым органе гэтай дзяржавы.

“Галоўная тэма сустрэч — вызваленне беларускіх палітвязняў. Ціханоўская падкрэсліла, што намаганні прыкладаюцца як па гуманітарным, так і па палітычным кірунку, але неабходна прыкласці ўсе намаганні і ўзмацніць міжнародную каардынацыю, каб прымусіць рэжым Лукашэнкі вызваляць людзей і спыніць рэпрэсіі”, — сказаў Вячорка.

Ён таксама паведаміў пра дамоўленасці з французскімі дэпутатамі “пашырыць працу групы “За дэмакратычную Беларусь” і правесці ў другой палове 2025 года ў Нацсходзе Францыі “Форум Каліноўскага”.

Падчас сустрэч, дадаў дарадца, узнімаліся тэмы легалізацыі беларускіх палітычных эмігрантаў, статусу “пашпарта новай Беларусі” і інш.

“Ціханоўская заклікала дэпутатаў узяць ганаровы патранаж над палітвязнямі і далучыцца да Дня салідарнасці з Беларуссю 25 сакавіка”, — адзначыў Вячорка.

Паводле яго слоў, дэпутаты “выказалі гатоўнасць наведаць Варшаву і Вільнюс, каб сустрэцца з былымі палітвязнямі і сем’ямі рэпрэсаваных”.

На сустрэчы парламентарый Фрэдэрык Пеці “афіцыйна перадаў Ціханоўскай фінальны даклад па назіранні за выбарамі ў Каардынацыйную раду”, адзначыў Вячорка, нагадаўшы, што менавіта Пеці кіраваў міжнароднай групай назіральнікаў за выбарамі ў КР у 2024 годзе.