13 лютага, Позірк. Вызваленне Беларуссю грамадзяніна ЗША, якое адбылося 12 лютага, — “не адзіная такая просьба” амерыканскіх уладаў, заявіла расійскаму агенцтву ТАСС прэс-сакратар Аляксандра Лукашэнкі Наталля Эйсмант.
“Гэта не адзіная просьба новай адміністрацыі ЗША, — сцвярджае яна. — Такія просьбы [пра вызваленне] паступалі і паступаюць. Мы аддаем перавагу ў гэтых пытаннях канфідэнцыйнасці. Уся інфармацыя пра дэталі — у Дзярждэпе ЗША і ў Белым доме”.
Пра выхад на волю экс-супрацоўніка “Радыё Свабода” Андрэя Кузнечыка, асуджанай за ўдзел у пратэстах Алены Маўшук і неназванага грамадзяніна ЗША паведаміла 12 лютага каманда беларускага дэмакратычнага лідара Святланы Ціханоўскай.
Дзяржсакратар ЗША Марка Рубіа вітаў вызваленне гэтых людзей. “Мы па-ранейшаму адданыя справе вызвалення іншых грамадзян ЗША ў Беларусі і іншых краінах. Мы заклікаем вызваліць амаль 1.300 палітычных зняволеных, якія застаюцца ў турмах па ўсёй Беларусі”, — адзначыў кіраўнік амерыканскага знешнепалітычнага ведамства ў заяве 12 лютага.
