Скарга на прысуд супрацоўніку прадстаўніцтва ЕС у Мінску будзе разгледжана 7 сакавіка

18 лютага, Позірк. Вярхоўны суд 7 сакавіка разгледзіць апеляцыйную скаргу на прысуд супрацоўніку прадстаўніцтва ЕС у Мінску, прапаведніку царквы евангельскіх хрысціян-баптыстаў “Дабравесце” Мікалаю Хіло, вынікае з раскладу пасяджэнняў на партале электроннага судаводства.

Скаргу разгледзіць суддзя Мікалай Грынцэвіч.

9 студзеня выданне Politico паведаміла, што Мінскі гарадскі суд прыгаварыў Хіло да чатырох гадоў пазбаўлення волі.

Яно ж працытавала афіцыйнага прадстаўніка Еўрапейскай службы знешніх дзеянняў Аніту Хіпер, якая 18 снежня заклікала да неадкладнага і безумоўнага яго вызвалення.

Са спасылкай на інфармацыю праваабарончага цэнтра “Вясна” выданне адзначала, што Хіло быў затрыманы ў Мінску 24 красавіка 2024 года, яго маглі абвінаваціць у абразе Аляксандра Лукашэнкі.

Пры гэтым утрымліваецца спасылка на словы чыноўніка ЕС, які пажадаў застацца ананімным. Ён паведаміў, што Хіло быў затрыманы КДБ перад офісам дэлегацыі Еўрасаюза ў Беларусі.

На партале электроннага судаводства ўказана, што Хіло абвінавачваўся паводле ч. 1 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і ч. 3 арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) Крымінальнага кодэкса.