Прэм’ер-міністр Індыі павіншаваў Лукашэнку праз 17 дзён пасля афіцыйнага падвядзення вынікаў “выбараў”

20 лютага, Позірк. Прэм’ер-міністр Індыі Нарэндра Модзі павіншаваў Аляксандра Лукашэнку “з пераабраннем на пасаду прэзідэнта Рэспублікі Беларусь падчас нядаўніх выбараў”, паведаміла 20 лютага прэс-служба адрасата.

Паводле яе сцвярджэння, кіраўнік індыйскага ўрада заявіў, што “з нецярпеннем чакае сумеснай працы па далейшым паглыбленні і пашырэнні сувязяў у новых галінах супрацоўніцтва для больш поўнай рэалізацыі сапраўднага патэнцыялу двухбаковых адносін”.

Такім чынам, віншаванне індыйскага прэм’ера паступіла праз 17 дзён пасля таго, як Цэнтрвыбаркам 3 лютага абвясціў Аляксандра Лукашэнку пераможцам праведзенага 26 студзеня ў Беларусі электаральнага мерапрыемства.

У дзень “выбараў“, 26 студзеня, Лукашэнка, віншуючы з Днём рэспублікі прэзідэнта Індыі Драупадзі Мурму і Нарэндру Модзі, запрасіў апошняга наведаць Беларусь “для абмеркавання ўсіх пытанняў двухбаковага парадку дня”. Раней ён таксама запрашаў у краіну Мурму.

Па стане на 20 лютага віншаванні з “пераабраннем“ Лукашэнка атрымаў ад кіраўнікоў дзяржаў і ўрадаў 37 краін. Аб непрызнанні вынікаў прэзідэнцкіх выбараў 26 студзеня ў той ці іншай форме заявіла 40 дзяржаў.

Падрабязнасці даступныя падпісчыкам “Позірк+”