Спакойныя выбары — вынік мер па “супрацьдзеянні экстрэмізму і тэрарызму”, лічыць МУС

21 лютага, Позірк. Спакой і парадак падчас выбараў — “вынік рэалізаванага на працягу апошніх пяці гадоў комплексу мер, накіраваных на барацьбу са злачыннасцю, супрацьдзеянне экстрэмізму і тэрарызму, інфармацыйнае супрацьстаянне”, — заявіў намеснік міністра ўнутраных спраў — начальнік крымінальнай міліцыі Генадзь Казакевіч на пасяджэнні калегіі ведамства 21 лютага.

“Дасягнутыя значныя вынікі ў барацьбе са злачыннасцю, — цытуе Казакевіча прэс-служба МУС. — Па лініі крымінальнага вышуку колькасць зарэгістраваных злачынстваў скарацілася на траціну. Значна вышэйшая ўдзельная вага раскрытых злачынстваў, у тым ліку цяжкіх і асабліва цяжкіх. Выяўленыя падазраваныя па ўсіх забойствах, згвалтаваннях, наўмысных цяжкіх цялесных пашкоджанняў, разбоях і рабаваннях. Раскрыты дзве траціны ўсіх крадзяжоў. Больш эфектыўна спрацавалі па злачынствах мінулых гадоў”.

Паводле Казакевіча, захоўваецца ўстойлівая тэндэнцыя зніжэння нарказлачынстваў, менш зарэгістравана злачынстваў супраць палавой недатыкальнасці або палавой свабоды непаўналетніх, а колькасць пацярпелых ад іх скарацілася больш чым на траціну.

Пры гэтым “аператыўная абстаноўка ў сферы кіберзлачыннасці характарызуецца істотным павелічэннем колькасці зарэгістраваных злачынстваў і сур’ёзнымі зменамі ў іх структуры”.

Намеснік міністра — камандуючы ўнутранымі войскамі МУС Мікалай Карпянкоў паведаміў, што для забеспячэння бяспечнага функцыянавання Беларускай АЭС на прылеглай да аб’екта тэрыторыі ўстаноўлены відэакамеры з падключэннем да рэспубліканскай сістэмы маніторынгу грамадскай бяспекі.

Актыўна развіваўся “кірунак прымянення беспілотных лятальных апаратаў і радыёэлектроннай барацьбы”. Сучасная тэхніка, што паступіла на ўзбраенне, “выкарыстоўваецца для забеспячэння масавых мерапрыемстваў і выканання задач у памежжы”. Працягвалася “сістэмная праца” па арганізацыі і падрыхтоўцы добраахвотніцкіх падраздзяленняў, сказаў Карпянкоў.

Агулам, паводле сцвярджэння МУС, узровень злачыннасці дасягнуў найменшага паказчыка за апошнія 10 гадоў. Значна паменшылася колькасць загінулых і параненых у выніку супрацьпраўных дзеянняў.

МУС сярод іншага займаецца палітычна матываваным пераследам нелаяльных да рэжыму грамадзян. Гэтая структура адказная за спісы “экстрэмісцкіх фармаванняў” і “экстрэмістаў”, куды ўключаюцца імёны і назвы тых, хто выказвае адрозную ад рэжымнай пазіцыю.

Раней блізкія да сілавых структур каналы размяшчалі відэазапісы з прыніжаючым чалавечую годнасць затрыманнем грамадзян супрацоўнікамі МУС. Цяпер такія ролікі не публікуюцца, аднак затрыманні не спыніліся, пра што сведчыць расклад судовых пасяджэнняў, а таксама інфармацыя, якая паступае ў рэдакцыю “Позірку”.