Энергазабеспячэнне ў двух раёнах Мінска парушалася праз абрыў провада на паветранай лініі электраперадачы

25 лютага, Позірк. Энергазабеспячэнне ў Першамайскім і Савецкім раёнах Мінска парушалася раніцай 25 лютага праз абрыў провада на паветранай лініі электраперадачы 110 кВ, паведамляе прэс-служба Міністэрства энергетыкі.

“Сёння ў 8:47 праз пашкоджанне ў электрычных сетках часова адключалася энергетычнае абсталяванне на падстанцыі “Зялёны луг”, — гаворыцца ў паведамленні. — Спецыялісты прадпрыемства “Мінскэнерга” неадкладна пачалі аднаўленчыя работы. У 9:29 электразабеспячэнне ўсіх спажыўцоў было адноўленае”.

“Па выніках праведзенага дэталёвага абследавання лініі электраперадачы “Мінск Паўночная — Мінск Усходняя” персаналам знойдзены абрыў провада ў пралёце апор, які стаў прычынай парушэння электразабеспячэння”, — адзначае Мінэнерга.

Раней “Позірк” паведамляў, што шэраг тралейбусаў і трамваяў не курсіраваў з 8:47 да 9:30 праз адсутнасць напругі на вуліцах Філімонава, Кедышкі, Кнорына, Кузьмы Чорнага, Мірашнічэнкі, Каліноўскага, а таксама бульвары Талбухіна і Лагойскім тракце.

Акрамя таго, адключэнне электраэнергіі прывяло да спынення помпавага абсталявання вадазабору № 5 “Бараўляны”, з-за чаго, паводле інфармацыі прадпрыемства “Мінскводаканал”, знізіўся ціск у вадаправоднай сетцы “ў квартале вуліц Мірашнічэнкі — Сядых — Лагойскі тракт — Гамарніка — Каліноўскага — Цікоцкага — Карбышава”.