Праваабаронцы прызналі палітвязнямі яшчэ 19 чалавек

26 лютага, Позірк. Беларуская праваабарончая супольнасць прызнала палітычнымі зняволенымі яшчэ 19 чалавек, вынікае з заявы на сайце цэнтра “Вясна”. Цяпер у Беларусі такіх 1.238.

Статус палітвязня атрымалі асуджаныя на невядомы тэрмін пазбаўлення волі Армэн Арзуманян (арт. 361 і 367 Крымінальнага кодэкса), Сяргей Латушка (арт. 369 і 368), Наталля Васіленка (арт. 369¹ і 367), Руслан Зубкоў(арт. 368 і 361⁴), Максім Ермаловіч (арт. 361¹ і 369), Дзмітрый Касцюк (арт. 369 і 368), Раман Раманаў (арт. 369 і 368), Уладзімір Марцінкевіч (арт. 369, 368, 203¹), Вячаслаў Курыльчык (арт. 361 і 361¹); прыгавораны да 7 гадоў зняволення Уладзімір Шпак (арт. 342, 361, 361¹), асуджаная на 2 гады Карына Праташчык (арт. 361 КК), а таксама Уладзіслаў Кошалеў, прыгавораны да абмежавання волі з накіраваннем у папраўчую ўстанову адкрытага тыпу на невядомы тэрмін (арт. 368).

Палітвязнямі таксама прызнаныя змешчаныя пад варту і абвінавачаныя Даніла Чыбісаў (арт. 361 і 361⁴), Павел Лашчанка (артыкул невядомы), Алена Елькіна (арт. 361 і 361¹), Антон Варабей (арт. 368), Андрэй Крэйдзіч(арт. 368), Глеб Жукаў (арт. 368), Ігар Шуканаў (арт. 342 і 367).

Праваабаронцы патрабуюць ад беларускіх уладаў неадкладна вызваліць усіх палітычных вязняў, перагледзець палітычна матываваныя выракі і спыніць рэпрэсіі супраць грамадзян краіны.

Апрача “Вясны” заяву падпісалі Беларускі ПЭН, Lawtrend, “Прававая ініцыятыва” і Беларускі Хельсінкскі камітэт.

Даведка “Позірку”:

• арт. 203¹ Крымінальнага кодэкса — незаконныя дзеянні ў дачыненні да інфармацыі пра прыватнае жыццё і персанальныя звесткі;
• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
• арт. 361 — заклікі да мер абмежавальнага характару (санкцый), іншых дзеянняў, скіраваных на прычыненне шкоды нацыянальнай бяспецы;
• арт. 361¹ — стварэнне экстрэмісцкага фарміравання або ўдзел у ім;
• арт. 361⁴ — садзейнічанне экстрэмісцкай дзейнасці;
• арт. 367 — паклёп у дачыненні да прэзідэнта;
• арт. 368 — абраза прэзідэнта;
• арт. 369 — абраза прадстаўніка ўлады;
• арт. 369¹ — дыскрэдытацыя Рэспублікі Беларусь.