Парламент Беларусі ратыфікаваў дагавор з РФ аб гарантыях бяспекі

26 лютага, Позірк. Палата прадстаўнікоў прыняла, а Савет Рэспублікі ўхваліў 26 лютага законапраект “Аб ратыфікацыі Дагавора паміж Рэспублікай Беларусь і Расійскай Федэрацыяй аб гарантыях бяспекі ў рамках Саюзнай дзяржавы”, вынікае з паведамленняў прэс-службаў ніжняй і верхняй палат Нацыянальнага сходу.

Дзеянне законапраекта, як паведамляецца, скіраванае на абарону грамадзян Беларусі і РФ “ад пагроз і правакацый”.

Паводле слоў старшыні Палаты прадстаўнікоў Ігара Сергяенкі, падпісанне дагавора прывяло да таго, што супраца па ўмацаванні абаронных патэнцыялаў дзвюх краін “выйшла на яшчэ больш высокі ўзровень”.

26 лютага Савет Федэрацыі (СФ) Расіі на пленарным пасяджэнні ратыфікаваў дагавор з Беларуссю аб гарантыях бяспекі ў рамках Саюзнай дзяржавы.

Член камітэта СФ па абароне і бяспецы Таймураз Мамсураў, які выступіў дакладчыкам па дакуменце, заявіў, што дагавор “носіць абарончы характар і не скіраваны супраць якіх-небудзь краін і аб’яднанняў”.

18 лютага дакумент, унесены на разгляд прэзідэнтам РФ Уладзімірам Пуціным, ратыфікавала ніжняя палата парламента — Дзяржаўная дума.

У адпаведнасці з арт. 9 дагавора аб гарантыях бяспекі, ён “падлягае ратыфікацыі ў адпаведнасці з працэдурамі кожнага з бакоў і набывае моц з дня абмену ратыфікацыйнымі граматамі”.

Лукашэнка і Пуцін падпісалі дагавор аб гарантыях бяспекі 6 снежня 2024 года ў Мінску ў рамках пасяджэння Вышэйшага дзяржсавета Саюзнай дзяржавы. Прэзідэнт РФ тады заявіў, што дакумент “вызначае ўзаемныя саюзніцкія абавязацельствы па забеспячэнні абароны, абарону суверэнітэту, незалежнасці і канстытуцыйнага ладу” дзвюх краін. Паводле яго слоў, таксама гаворка ідзе пра “цэласнасць і недатыкальнасць тэрыторыі і знешняй мяжы Саюзнай дзяржавы, прычым з задзейнічаннем усіх існых сіл і сродкаў”.

Сярод іншага дакумент дае магчымасць Расіі ствараць у Беларусі вайсковыя аб’екты.