За суткі ад агню ў Беларусі памерла шэсць чалавек

9 сакавіка, Позірк. Шэсць чалавек памерла ад агню ў Беларусі за мінулыя дзяжурныя суткі (з 6:00 8 сакавіка да 6:00 9 сакавіка), сведчаць даныя Міністэрства па надзвычайных сітуацыях.

Трагічныя выпадкі адбыліся ў Віцебску, Аршанскім раёне (Віцебская вобласць), Кобрынскім (Брэсцкая), Асіповіцкім (Магілёўская), Слонімскім (Гродзенская), Салігорскім (Мінская).

Паводле звестак МНС, з пачатку года ў Беларусі адбылося 1.487 пажараў — на 38,6% больш, чым за аналагічны перыяд 2024-га (1.073). Загінула 179 чалавек (+37,7%; 130).

Адметна, што ў зводцы 7 сакавіка паведамлялася пра 176 загінулых з пачатку года. Пасля гэтага, паводле статыстыкі МНС, ад агню ў Беларусі памерла яшчэ сем чалавек.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост (колькасці загінулых пры пажарах. — “Позірк”.)”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта састарэлыя людзі, якія самотна пражываюць, пенсіянеры, інваліды. Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”.