Украінцы з акупаваных РФ тэрыторый масава трапляюць на радзіму праз пункт пропуску на мяжы з Беларуссю — СМІ

9 сакавіка, Позірк. Адзін з пунктаў пропуску на беларуска-ўкраінскай мяжы актыўна выкарыстоўваецца для накіравання на радзіму грамадзян Украіны з акупаваных Расіяй тэрыторый і анэксаванага Крыма, паведамляе партал suspilne.media.

З’ява носіць масавы характар, у публікацыі гаворыцца, што такім чынам ва Украіну праходзіць “па 15 чалавек кожны дзень”.

Гаворка ідзе аб пункце пропуску, які злучае Брэсцкую і Валынскую вобласці.

“Людзі пераадольваюць тысячы кіламетраў праз Расію і Беларусь”, — цытуе СМІ валанцёра грамадскай арганізацыі “Helping to leave” па імені Сяргей.

Паводле яго слоў, ва Украіну праз Беларусь ідуць у асноўным жанчыны і дзеці з акупаваных РФ тэрыторый Херсонскай, Запарожскай, Данецкай і Луганскай абласцей. “Мужчын вельмі мала, і калі едуць, то з хваробамі або інваліднасцю”, — адзначыў валанцёр.

“Там няма будучыні, няма медыцыны, вучобы, — дадаў ён, маючы на ўвазе зону акупацыі. — Людзі адчуваюць сябе прыгнечанымі. Звычайна біяметрычных дакументаў ніхто не атрымліваў, бо ніхто не думаў ехаць нікуды. І вяртаюцца сюды”.

Медыя прыводзіць у прыклад 16-гадовага падлетка Данііла, які “з’ехаў з акупаванай Херсоншчыны”.

“Хлопец марыць атрымаць украінскую або еўрапейскую адукацыю. Кажа, што таму і выехаў з часова акупаванай тэрыторыі. Выехаў сам праз царкоўную валанцёрскую дапамогу”, — адзначаецца ў публікацыі.

“Даехалі мы лёгка. Нас палохалі і казалі, што на мяжы будзе вельмі цяжка. Але ўсе межы мы прайшлі вельмі лёгка. Мы ехалі праз Мелітопаль, Марыупаль, потым мы спыняліся ў Растове, там мы начавалі. А потым мы паехалі ў Мінск, дзе пераначавалі. А адтуль паехалі да гэтай мяжы”, — сказаў Данііл.

Таксама распавядаецца пра 88-гадовую жанчыну, якую каля мяжы з украінскага боку сустрэлі сваякі.

Паведамляецца, што “перавозчыка, які давёз людзей да беларуска-ўкраінскай мяжы на Валыні, родныя знайшлі ў інтэрнэце”. Дарога з акупаваных тэрыторый да Валынскай вобласці заняла ў пенсіянеркі трое сутак.

Паводле слоў прэс-сакратара Валынскага пагранічнага атрада Маргарыты Вяршынінай, на выезд праз гэты пункт пропуску людзі рухацца не могуць, перасекчы яго можна толькі пешшу.

“Штодня праз гэты пункт пропуску ідуць нашы грамадзяне. Мы правяраем пашпартныя дакументы, або іншыя дакументы, якія пацвярджаюць асобу, а таксама прыналежнасць да грамадзянства Украіны. Выпадкаў непропуску нашых грамадзян на тэрыторыю Украіны праз гэты пункт перасячэння не было”, — адзначыла Вяршыніна.

“Людзі, якія перасеклі беларуска-ўкраінскую мяжу, далей едуць у транзітныя цэнтры ў Ковелі. Там іх сустракаюць валанцёры”, — паведамляе медыя.

З інфармацыі на сайце Дзяржаўнага пагранічнага камітэта Беларусі вынікае, што на мяжы Брэсцкай і Валынскай абласцей знаходзяцца тры пункты пропуску: Тамашоўка (з украінскага боку — Пулямец), Олтуш (Пішча) і Макраны (Даманава).

Пасля пачатку поўнамаштабнай расійскай агрэсіі ва Украіне, падтрыманай уладамі ў Мінску, беларуска-ўкраінская мяжа закрытая для свабоднага перамяшчэння людзей. Яе ахоўваюць украінскія вайскоўцы і памежнікі.