Праўкраінскі праект TPBELA прызнаны “экстрэмісцкім фарміраваннем”

11 сакавіка, Позірк. Міністэрства ўнутраных спраў 10 сакавіка прызнала праект TPBELA “экстрэмісцкім фарміраваннем”, адпаведныя змены ўнесены ў спіс на сайце ведамства.

Датычных да “фарміравання” МУС не называе.

Цяпер у спісе 266 “экстрэмісцкіх фарміраванняў”.

Тэлеграм-чат TPBELA мае 6.933 падпісчыкі. Тэлеграм-канал “Пабраціма”, які названы датычным да праекта, — 41.

TPBELA пазіцыянуе сябе як беларускі ваенны канал, які працуе кругласутачна, публікуючы навіны. Падтрымлівае Украіну ў супрацьстаянні расійскай агрэсіі.

У лютым 2023 года тэлеграм-канал праекта быў прызнаны “экстрэмісцкім” паводле рашэння суда Цэнтральнага раёна Гомеля. Каманда адрэагавала на гэта, напісаўшы, што знаходзіцца “на правільным шляху”.

Дзейнасць, якая адносіцца да “экстрэмісцкай”, пераследуецца ўладамі ў крымінальным парадку. Гэта адзін з актыўных інструментаў палітычных рэпрэсій.