За шэсць дзён небывалага для пачатку сакавіка цяпла абноўлена каля 270 тэмпературных рэкордаў
12 сакавіка, Позірк. Шэсць дзён запар у Беларусі абнаўляюцца абсалютныя максімумы тэмператур за ўвесь перыяд інструментальных метэаназіранняў (з 1881 года), лакальных рэкордаў за перыяд небывалага для пачатку сакавіка цяпла перапісана каля 270, вынікае з праведзенага “Позіркам“ параўнання аператыўных і архіўных даных Белгідрамета.
11 сакавіка ў Жлобіне паветра прагрэлася да 17,6 градуса. Перапісаны рэкорд дня паўвекавой даўнасці (16,6 градуса ў 1975 годзе ў Гродне). У самім Жлобіне экстрэмум дня пратрымаўся 10 гадоў (14,7).
Мінулым днём былі абноўленыя лакальныя экстрэмумы на 35 з 48 метэастанцыях, архіў якіх даступны.
Восем перакрытых рэкордаў трымаліся з 1961 года: у Жыткавічах (16,7 супраць 15,1), Пружанах (16,3 супраць 15,5), Шаркаўшчыне (15,5 супраць 12,7), Полацку (15,4 супраць 12,8), Наваградку (15,4 супраць 14,1), Верхнядзвінску (14,4 супраць 12,4), Лепелі (14,3 супраць 13,4), Вілейцы (14,2 супраць 13,9).
У двух гарадах — Брэсце і Ваўкавыску — перапісаныя максімумы 50-гадовай даўніны (адпаведна 16,2 супраць 15,6 і 16,8 супраць 15,9).
Астатнія перакрытыя максімумы ставяцца да 1997-га (15), 2001-га (3), 2014-га (2) і 2015-га (5) гадам.
