Дзяржпагранкамітэт выклаў сваю версію, чаму Латвія перакрывала пункт пропуску Патэрніекі

17 сакавіка, Позірк. Прычынай часовага перакрыцця 16 сакавіка руху на латвійскім пункце пропуску Патэрніекі (з беларускага боку — Грыгароўшчына) стала “група афрыканцаў, якія накіроўваліся ў Еўрапейскі саюз з сапраўднымі дакументамі”, сцвярджае Дзяржаўны пагранічны камітэт.

У паведамленні беларускага пагранведамства ад 17 сакавіка не ўдакладняецца, ці былі сярод згаданых ім дакументаў дзейныя візы або іншыя падставы ўезду ў Латвію.

Паводле сцвярджэння Дзяржпамежкамітэта, “пасля перасячэння беларуска-латвійскай мяжы ў сумежным пункце пропуску дзесяцярым замежнікам было адмоўлена ў афармленні”.

Латвійскі памежны нарад, як заявіў беларускі бок, “перагарадзіў дарогу ў абодвух напрамках металічным плотам і не прапускаў замежнікам, якія спрабавалі высветліць прычыну адмовы ва ўездзе на тэрыторыю сумежнай дзяржавы”.

Пры гэтым паведамляецца, што “беларускія пагранічнікі неадкладна адрэагавалі на перакрыцце руху і прапанавалі афрыканцам вярнуцца на тэрыторыю беларускага пункта пропуску, каб латвійскія службы аднавілі афармленне”. “Пра ўсё тое, што адбываецца, былі апавешчаныя і людзі, якія чакаюць выезду за мяжу”, — адзначае ведамства.

“Спачатку замежныя грамадзяне, якія знаходзіліся на латвійскай тэрыторыі, не пагаджаліся вяртацца ў Беларусь. Аднак праз 6 гадзін — у 20:00 — яны пакінулі тэрыторыю Еўрасаюза. Беларускія пагранічнікі далі афрыканцам памяшканне для адпачынку, напаілі іх гарбатай, а затым арганізавалі транспарт для вяртання ў Беларусь”, — заяўляе Дзяржпамежкамітэт.

17 сакавіка начальнік Дзяржаўнай памежнай аховы (ДПА) Латвіі Гунтыс Пуятс заявіў, што прычынамі здарэння сталі “нестабільная праца тэхнічных сістэм” і “наяўная рызыка выкарыстання пераходу для інструменталізацыі нелегальнай міграцыі”: памежнікі назіралі шмат груп мігрантаў на беларускім баку.

“Пасля аналізу інфармацыі былі выяўленыя высокія рызыкі таго, што пункт пропуску можа быць выкарыстаны для масавай перакідкі мігрантаў у Латвію з Беларусі. Назіранне гэта пацвярджае”, — патлумачыў кіраўнік ДПА.

Пуятс паведаміў, што на тым баку мяжы сабралася некалькі дзясяткаў чалавек, і гэтая прэвентыўная мера была прынятая для прадухілення спробы пранікнення ў Латвію некалькіх сотняў чалавек.

Кіраўнік памежнай службы Латвіі заявіў, што гэта першы выпадак, калі рашэнне пра закрыццё пункта памежнага кантролю давялося прымаць неадкладна.

Начальнік ДПА паведаміў, што ведамства, якім ён кіруе, прапанавала ўраду часткова закрыць пункт пропуску Патэрніекі, дазволіўшы яго перасячэнне толькі для аўтатранспартных сродкаў. Адначасова ён заявіў, што калі плынь нелегальных мігрантаў дасягне крытычнага ўзроўню, Дзяржаўная памежная ахова можа запатрабаваць поўнага закрыцця памежнага пераходу.

Грыгароўшчына застаўся адзіным дзейным пунктам пропуску на мяжы дзвюх краін пасля таго, як 19 верасня 2023 года праз узрослую плынь нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).