Ціханоўская заклікала вызваліць асуджанага ў Беларусі грамадзяніна Японіі Наканісі Масатосі

18 сакавіка, Позірк. Неадкладна вызваліць асуджанага ў Беларусі грамадзяніна Японіі Наканісі Масатосі заклікала дэмакратычны лідар Святлана Ціханоўская.

“Выкладчык універсітэта быў абвінавачаны ў “зборы выведніцкай інфармацыі”. Як і іншыя палітычныя зняволеныя, ён сутыкаецца з дэгуманізацыяй з боку прапаганды рэжыму”, — напісала палітык на сваёй старонцы ў сацыяльнай сетцы Х.

17 сакавіка Мінскі гарадскі суд прыгаварыў Наканісі Масатосі да 7 гадоў пазбаўлення волі ва ўмовах узмоцненага рэжыму паводле арт. 358¹ КК (агентурная дзейнасць), а таксама пастанавіў спагнаць з яго штраф у памеры 500 базавых велічыняў (21.000 рублёў).

У дзень вынясення выраку амбасада Японіі ў Беларусі паведаміла японскаму тэлеканалу NHK, што ўрад у Токіа кантактуе з Мінскам і заклікае неадкладна вызваліць Наканісі Масатосі. У дыпламатычным прадстаўніцтве таксама заяві, што працягнуць “рабіць адпаведныя захады з пункту гледжання абароны японскіх грамадзян”.

Мінгарсуд разглядаў справу грамадзяніна Японіі з 10 студзеня ў закрытым рэжыме. Суддзя — Анжэла Касцюкевіч, якая раней вынесла шэраг палітычна матываваных прысудаў.

Наканісі Масатосі затрымалі ў ліпені 2024 года, пра што стала вядома 5 верасня з рэпартажу “Правал “самурая” з Токіа” на тэлеканале “Беларусь 1”.

Начальнік Следчага ўпраўлення КДБ Канстанцін Бычак тады сцвярджаў, што замежнік, знаходзячыся на тэрыторыі Беларусі, ажыццяўляў збор і перадачу на адрас японскай спецслужбы “выведніцкай інфармацыі ваеннага характару, у прыватнасці, пра беларускую вайсковую інфраструктуры, пра перамяшчэнне войскаў і вайсковай тэхнікі, пра цяперашнюю сітуацыю на паўднёвым кірунку”.

У матэрыяле было сказана, што Наканісі Масатосі пераехаў у Гомель у 2018 годзе. З абласнога цэнтра ён нібыта ездзіў у раён беларуска-ўкраінскай мяжы, дзе “здымаў дарогі, масты, стратэгічныя аб’екты, кшталту вакзалаў ці аэрапортаў, інфраструктуру вайсковых аб’ектаў, а таксама чыгуначныя шляхі, напрыклад, там, дзе ляжаць вузкакалейныя рэйкі”.

Сцвярджалася, што мужчына за шэсць гадоў жыцця ў Беларусі зрабіў больш за 9 тыс. “дакладных фатаграфій з беларуска-ўкраінскага прыгранічча”, якія ён “баяўся перадаваць праз інтэрнэт, а хацеў выключна асабіста, у рукі” аддаць “куратарам” пасля прыбыцця ў Японію.

Пра затрыманне ў Беларусі яшчэ аднаго японскага грамадзяніна за здымку аб’ектаў чыгуначнай інфраструктуры стала вядома летась 3 снежня.