“Вольныя купалаўцы” ўганараваныя прэміяй Міністэрства культуры Польшчы
18 сакавіка, Позірк. Тэатральная трупа “Вольныя купалаўцы” атрымала ў Польшчы прэмію з Фонду прамоцыі культуры, паведамляе прэс-служба Аб’яднанага пераходнага кабінета (АПК).
Адпаведнае рашэнне прынятае 17 сакавіка міністрам культуры і нацыянальнай спадчыны Польшчы Ханнай Урублеўскай, якая ўхваліла адпаведную ініцыятыву былога дырэктара Купалаўскага тэатра Паўла Латушкі.
Адзначаецца, што Фонд прамоцыі культуры — гэта дзяржаўная праграма ў Польшчы, якая рэалізуецца Мінкультам і скіраваная на падтрымку развіцця культуры і мастацтва праз сацыяльную дапамогу артыстам.
“Для мяне, як для палітыка, заўсёды будзе прыярытэтам падтрымка нацыянальнай культуры Беларусі, у тым ліку ў выгнанні. Зразумела, што Купалаўскі тэатр заўсёды будзе ў маім сэрцы, і я буду рабіць усё дзеля таго, каб дапамагчы “Вольным купалаўцам” за іх талент, майстэрства і адданасць нацыянальнай беларускай культуры”, — заявіў Латушка, які цяпер з’яўляецца намеснікам кіраўніка АПК, кіраўніком Народнага антыкрызіснага ўпраўлення.
Палітык падкрэсліў, што нядаўна яму ўдалося знайсці для “Вольных купалаўцаў” сродкі на рэалізацыю двух новых тэатральных праектаў.
“Заклікаю падтрымліваць купалаўцаў. Калі ў вас ёсць магчымасць, купіце білет па падвойнай або нават патройнай цане, падтрымаеце купалаўцаў і нацыянальную культуру, без якой немагчыма ўявіць незалежную дзяржаву — Беларусь. Купалаўскі тэатр — найстарэйшы тэатр Беларусі, душа беларускага народа. Нам таксама важна памятаць, што хутка і ён адновіць сваю творчую дзейнасць у свабоднай Беларусі”, — сказаў Латушка.
Трупа “Вольныя купалаўцы”, якая вымушана працуе за мяжой з-за пагрозы палітычнага пераследу ў Беларусі, у снежні 2024 года была прызнаная “экстрэмісцкім фарміраваннем” — нібыта за “арганізацыю дзейнасці па падрыхтоўцы здзяйснення замахаў на суверэнітэт і грамадскую бяспеку Рэспублікі Беларусь, дыскрэдытацыю і абразу службовых асоб”.
“Вольныя купалаўцы” — аб’яднанне былых акцёраў Нацыянальнага акадэмічнага тэатра імя Янкі Купалы, якія пакінулі Беларусь пасля пратэстаў 2020 года. Цяпер яны выступаюць у Польшчы і гастралююць па краінах ЕС. Латушка быў дырэктарам тэатра з сакавіка 2019 да жніўня 2020 года, пасля чаго далучыўся да апазіцыі ў знак пратэсту супраць фальсіфікацыі вынікаў прэзідэнцкіх выбараў на карысць Аляксандра Лукашэнкі.