За мінулыя суткі агонь забраў пяць жыццяў

19 сакавіка,Позірк. За мінулыя дзяжурныя суткі (з 6:00 18 сакавіка да 6:00 19 сакавіка) ад агню ў Беларусі пайшлі з жыцця пяць чалавек, сведчаць даныя Міністэрства па надзвычайных сітуацыях.

Трагедыі адбыліся ў Лельчыцкім раёне (Гомельская вобласць), Гродзенскім, Іўеўскім (Гродзенская), Пухавіцкім (Мінская), Круглянскім (Магілёўская).

Паводле звестак МНС, з пачатку года ў Беларусі адбылося 1.693 пажары — на 34,7% больш, чым за аналагічны перыяд 2024-га (1.257). Загінула 196 чалавек (+38%; 142).

Адметна, што ў табліцы даных, якія публікуюцца ведамствам, часам адбываецца карэкцыя звестак па смяротнасці на пажарах у бок заніжэння. На такія выпадкі “Позірк” двойчы звяртаў увагу.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінулых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з курэннем у стане алкагольнага ап’янення, адзначыў прадстаўнік МНС.

“Сёння мы рэалізуем дастаткова дакладны, адрасны, на падставе сур’ёзнага аналізу комплекс прафілактычных мер, — паведаміў Бараноўскі. — І мы бачым партрэт групы рызыкі. Мы ўсе цудоўна ведаем, што пажары ў асноўным адбываюцца ў начны час сутак, ахвярамі агню становяцца людзі, якія вядуць асацыяльны лад жыцця. Гэта састарэлыя людзі, якія самотна пражываюць, пенсіянеры, інваліды”.

“Сёння на дзяржаўным узроўні, у рамках працы ўсіх зацікаўленых суб’ектаў прафілактыкі (не толькі МНС) <…> робіцца ўсё для таго, каб стабілізаваць гэтую абстаноўку, але разам з тым праблема існуе”, — заявіў ён.