У Мінску з-за рэпетыцый вайсковага парада адменены шэраг рэйсаў грамадскага транспарту

19 сакавіка, Позірк. З-за руху ваеннай тэхнікі да месцаў рэпетыцый вайсковага парада да Дня Перамогі ў Мінску адменены шэраг рэйсаў грамадскага транспарту, паведамляе прэс-служба “Мінсктранса”.

Адзначаецца, што пасажыры сутыкнуцца з нязручнасцямі 25 сакавіка, 1, 8, і 15 красавіка.

Адмяняюцца рэйсы аўтобусаў №64 (ад ДС “Уручча-2” у 05:52, ад прыпынку “Макаёнка” ў 06:16), №86 (ад прыпынку “Русіянава” ў 05:19, ад прыпынку “Сухарукія” ў 05:37 і 05:57), №155 (ад ж/д станцыі “Азярышча” ў 06:01), №194 (ад станцыі метро “Уручча” ў 05:11, ад прыпынку “Прамяністая” ў 05:40).

Аўтобусная лінія №86 ад прыпынку “Копішча” ў 05:20 і №155 ад ДС “Уручча-4” у 05:22 скарачаецца да прыпынку “Старынаўская”.

Таксама змяняецца маршрут аўтобуса №167 пры выкананні рэйса з прыпынку ДС “Уручча-2” у 05:27. Ён будзе пралягаць па вуліцы Русіянава, праспекце Незалежнасці, аўтадарозе Н-9031, вуліцы Цюленіна і далей па звыклым маршруце.

Раней прэс-служба Міністэрства абароны паведамляла, што з 18 сакавіка на аэрадроме Ліпкі ва ўсходняй частцы Мінска цягам пяці тыдняў будуць праводзіцца трэніроўкі тэхнікі механізаванай калоны да параду на 9 траўня.

Ваеннае ведамства папярэджвала, што ў сувязі з перамяшчэннем тэхнікі да месца трэніровак і назад у сталіцы “будзе ўводзіцца абмежаванне руху“.

З 4:50 прыкладна на гадзіну будзе абмежаваны рух па маршруце: вул. Заснавальнікаў — вул. Старынаўская — вул. Францыска Скарыны — знешняе кола МКАД — паварот да жылога комплексу “Зялёная гавань” — аўтадарога да аэрадрома Ліпкі.

З 19:50 прыкладна на працягу гадзіны будуць дзейнічаць абмежаванні па маршруце: аэрадром Ліпкі — знешняе кола МКАД — вул. Францыска Скарыны — вул. Старынаўская — вул. Заснавальнікаў.

З нагоды 80-годдзя перамогі ў Мінску плануецца правесці маштабны парад, паведаміў напрыканцы лютага памочнік міністра абароны па ідэалагічнай працы ва Узброеных сілах Леанід Касінскі. Паводле яго слоў, чакаецца ўдзел вайскоўцаў з шэрагу “дружалюбных краін”.

“Задума парада маштабная, — сказаў ён. — Плануецца ўдзел больш як 24 парадных разлікаў, а таксама паветраных суднаў. <…> Мы запрасілі парадныя разлікі з дружалюбных нам краін — Расійскай Федэрацыі, Кітая, а таксама сцяганосныя групы з дзяржаўнымі сцягамі рэспублік СНД. Часткова пацвярджэнне аб удзеле шэрагу краін ужо атрымана”.

15 сакавіка стала вядома, што Аляксандр Лукашэнка 9 траўня будзе прысутнічаць на вайсковым парадзе ў Маскве. Ці мае ён намер сустрэць парад у беларускай сталіцы, а затым накіравацца ў РФ, ці ўсё ж ён праігнаруе ўрачыстасці на радзіме дзеля ўдзелу ў расійскіх, пакуль невядома.

Летась Лукашэнка накіраваўся ў Маскву 8 траўня, дзе ў той дзень адбыўся саміт Еўразійскага эканамічнага саюза. Удзень 9 траўня ён прысутнічаў на парадзе на Краснай плошчы, а ўвечары вярнуўся ў Мінск і выступіў на акцыі “Беларусь памятае”.