У гаражы жыхара Польшчы выяўленыя нелегальна ўвезеныя беларускія цыгарэты

12 лютага, Позірк. Пра выяўленне партыі нелегальных цыгарэт з беларускімі акцызнымі маркамі паведаміла 12 лютага Памежная ахова Польшчы.

Адзначаецца, што 11 лютага ў Ольштынскім павеце памежнікі заўважылі, як мужчына выносіць з гаража кардонныя скрынкі. Высветлілася, што 47-гадовы паляк захоўваў у памяшканні больш за 42 тыс. адзінак тытунёвых вырабаў з беларускімі акцызнымі маркамі арыентыровачным коштам 43 тыс. злотых (больш за 12 тыс. долараў ЗША).

Цыгарэты былі канфіскаваныя, далейшыя працэсуальныя дзеянні па справе праводзяць супрацоўнікі памежнай аховы ў Ольштыне.

2 лютага памежная ахова Польшчы паведаміла, што ў студзені 2026 года ў краіне выяўлена 1,75 млн цыгарэт, дастаўленых з Беларусі з дапамогай паветраных шароў. Кошт канфіскаванага тавару ацэньваецца ў 1,78 млн злотых (каля 497 тыс. долараў).