Вучэнні тэрабороны пройдуць у двух раёнах Брэсцкай — на мяжы з Украінай, недалёка ад Польшчы

26 ліпеня, Позірк. Вучэнні сіл тэрытарыяльнай абароны Маларыцкага і Драгічынскага раёнаў (Брэсцкая вобласць) анансавала Міністэрства абароны.

Вучэнні, як заяўлена, пройдуць 26–28 ліпеня “ў рамках навучальных збораў з ваеннаабавязанымі тэрытарыяльных войскаў пад кіраўніцтвам намесніка старшыні Брэсцкага абласнога выканаўчага камітэта”.

“Падчас вучэнняў будуць адпрацаваныя пытанні аховы аб’ектаў, забеспячэння асаблівых прававых рэжымаў, барацьбы з дыверсійнымі групамі праціўніка і прымянення беспілотных лятальных апаратаў і абароны ад іх”, — гаворыцца ў паведамленні.

Пры падрыхтоўцы і правядзенні вучэнняў ваеннаабавязаныя тэрытарыяльных войскаў “выканаюць задачы па падрыхтоўцы агнявых пазіцый у раёнах выканання задач”, адзначае ведамства.

“Таксама да вучэння будуць прыцягнутыя органы ўнутраных спраў, атрады народнага апалчэння і іншыя арганізацыі раёнаў”, — паведамляе Мінабароны.

7 ліпеня паведамлялася аб пачатку “планавых навучальных збораў” з ваеннаабавязанымі тэрытарыяльных войскаў Маларыцкага і Драгічынскага раёнаў, яны працягнуцца да 31 ліпеня.

У рамках збораў плануецца ажыццявіць “▫️прыём ваеннаабавязаных <…> і іх усебаковае забеспячэнне; аднаўленне навыкаў каманднага складу ў кіраванні падначаленымі; падрыхтоўку ваеннаабавязаных да выканання задач у адпаведнасці са службовым прызначэннем; адпрацоўку пытанняў фармавання, падрыхтоўкі і прымянення атрадаў народнага апалчэння”, паведамляла тады Мінабароны.

Заяўлялася, што “асноўная ўвага” будзе нададзеная “адпрацоўцы задач тэрытарыяльнай абароны ў ходзе рэалізацыі захадаў ваеннага становішча з адпрацоўкай пытанняў абароны асабовага складу і аб’ектаў ад беспілотных лятучых апаратаў”.

Варта адзначыць, што абодва згаданыя раёны мяжуюць з Валынскай вобласцю Украіны. Акрамя таго, ад заходняй ускраіны Маларыцкага раёна да мяжы з Польшчай — каля 10 кіламетраў, Драгічынскага раёна — каля 75 км.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны (напад пачаўся ў тым ліку з беларускай тэрыторыі). На гэтым фоне ў краіне практычна безупынна праводзяцца вайсковыя вучэнні. Апошнім часам Аляксандр Лукашэнка ўсё часцей заяўляе, што Беларусь “рыхтуецца да вайны”.

У той жа час Кіеў у апошні час заняў больш жорсткую пазіцыю ў дачыненні да Мінска. Прэзідэнт Украіны Уладзімір Зяленскі публічна запатрабаваў ад беларускіх уладаў неадкладна спыніць любую падтрымку Расіі.