Тры чалавекі памерлі ў Лагойску пасля сумеснага распіцця алкаголю, яшчэ адзін мужчына — у рэанімацыі

26 ліпеня, Позірк. Пра смерць трох чалавек у Лагойску (Мінская вобласць) паведамляе Следчы камітэт.

Адзначаецца, што раніцай 26 ліпеня ў адным з жылых дамоў выяўленыя без прыкмет жыцця целы 44-гадовага мужчыны і дзвюх жанчын (40 і 42 гадоў). Яшчэ адзін пацярпелы — 54-гадовы муж адной з загінулых — “экстрана шпіталізаваны ў рэанімацыйнае аддзяленне з прыкметамі вострага атручвання”.

Паводле папярэдняй інфармацыі, напярэдадні “кампанія з дзевяці чалавек бавіла час за сумесным ужываннем алкаголю”.

На месцы здарэння працуе следча-аператыўная група, прыцягнутыя следчыя-крыміналісты і спецыялісты Дзяржаўнага камітэта судовых экспертыз. “Праводзіцца дэталёвы агляд, фіксуецца следавая карціна, адбіраюцца сляды і аб’екты, апытваюцца відавочцы”, — паведамляе СК.

Для высвятлення прычыны смерці грамадзян прызначаны шэраг экспертыз, у тым ліку судова-медыцынскія і хіміка-таксікалагічныя.

“Следчымі адпрацоўваюцца розныя версіі таго, што здарылася, у тым ліку вострае атручэнне сурагатамі алкаголю або наркатычнымі сродкамі”, — адзначае ведамства.

Распачатая крымінальная справа паводле ч. 2 арт. 144 КК (прычыненне смерці па неасцярожнасці двум і больш асобам).