Міністр сельскай гаспадаркі Малдовы прапанаваў адмовіцца ад экспарту тавараў у Беларусь

20 верасня, Позірк. Міністр сельскай гаспадаркі Малдовы Яўджэніу Асмакеску выступіў за поўную адмову ад экспарту тавараў у Беларусь і Расію, паведамляе выданне “КП у Малдове”.

Падкрэсліўшы, што гэта яго “асабістае меркаванне”, кіраўнік ведамства заявіў, што адмова ад паставак пакажа “поўную прыхільнасць” Кішынёва санкцыйнай палітыцы Захаду ў дачыненні да дзвюх краін.

“Трэба ўлічваць, што ў нас ёсць экспарцёры на гэтыя два рынкі — больш на Беларусь, чым на Расію”, — канстатаваў Асмакеску.

Ён адзначыў, што такія кампаніі пацерпяць праз забарону на экспарт, таму ўлады Малдовы “павінны распрацаваць праграму для іх падтрымкі, каб дапамагчы пранікнуць на рынак Еўрасаюза”.

Смеласць малдаван “дае надзею беларусам”, адзначыла дэмакратычны лідар Святлана Ціханоўская, віншуючы 27 жніўня прэзідэнта Малдовы Маю Санду і народ гэтай краіны з Днём Незалежнасці.

“Малдова паказала, што нават ва ўмовах бесперапыннага ціску нацыя здольная абараніць сваю дэмакратыю, суверэнітэт і еўрапейскі выбар”, — напісала палітык на сваёй старонцы ў сацыяльнай сетцы Х.

Аляксандр Лукашэнка, віншуючы ў той жа дзень малдаўскі народ з нацыянальным святам, выказаў упэўненасць у тым, што “назапашаны за тры дзесяцігоддзі досвед узаемавыгаднага супрацоўніцтва”, нягледзячы на “напружаную міжнародную абстаноўку”, паслужыць “асновай для аднаўлення паўнавартаснага канструктыўнага дыялогу” паміж Беларуссю і Малдовай.

14 ліпеня паведамлялася, што Малдова далучылася да прынятага месяцам раней пакета санкцый Еўрасаюза, у якім фігуруе беларуская кампанія “Ізавак”.

26 траўня ў Мінску Лукашэнка прыняў былога прэзідэнта Малдовы, старшыню апазіцыйнай Партыі сацыялістаў Ігара Дадона. Беларускі палітык на сустрэчы з ім заклікаў аднавіць працу міжурадавай камісіі па гандлёва-эканамічнай супрацы.

Лукашэнка тады прапанаваў апазіцыянеру з Малдовы — краіны са статусам кандыдата на ўступленне ў ЕС — абмеркаваць тэматыку Еўразійскага эканамічнага саюза.

Паводле інфармацыі на сайце амбасады Беларусі ў Малдове, апошняе, 19-е пасяджэнне міжурадавай камісіі па гандлёва-эканамічнай супрацы праведзенае ў Кішынёве 7 чэрвеня 2018 года, то бок падчас прэзідэнцкага тэрміну Дадона.

Паводле даных беларускага МЗС, у 2024 годзе тавараабарот паміж Беларуссю і Малдовай склаў 176,1 млн долараў. Экспарт беларускіх тавараў у Малдову склаў 98,3 млн, а імпарт малдаўскіх тавараў у Беларусь — 77,8 млн.

Асноўнымі пазіцыямі беларускага экспарту ў Малдову ў 2024 годзе сталі бульба, сыры і тварог, лекавыя сродкі, мяккія дахавыя матэрыялы, трактары, сродкі для валасоў, гарсэтныя вырабы, пліты, лісты, плёнка з пластмас, гатовая або кансерваваная рыба, часткі і прылады для аўтамабіляў і трактароў.

Аснову імпарту тавараў з Малдовы склалі вінаградныя натуральныя віны, моцныя спіртныя напоі, свежая садавіна і гародніна, кукуруза, вінаград, яблыкі, грушы і айва, прыборы і прылады для аўтаматычнага рэгулявання і кіравання, лекавыя сродкі, тара, сушаная садавіна.

Ціханоўская наведвала Малдову ў кастрычніку 2023 года на запрашэнне дзейнага прэзідэнта краіны Маі Санду.

5 верасня 2025 года даверчыя граматы Санду ўручыў амбасадар Беларусі Ігар Бубен.

Прыкладна праз месяц, 2 кастрычніка, Ціханоўская і Санду мелі размову на палях саміту Еўрапейскай палітычнай супольнасці ў Капенгагене.