У Тбілісі адбываюцца пікеты з патрабаваннем не дапусціць дэпартацыі арыштаванага беларуса на радзіму

10 лістапада, Позірк. З 7 лістапада ў Тбілісі адбываюцца пікеты з патрабаваннем не дапусціць дэпартацыі на радзіму арыштаванага беларуса з пратэрмінаванымі дакументамі і адмовай у прытулку.

Акцыі арганізуе беларускі праваабаронца Раман Кісляк, які таксама не мае дзейсных дакументаў, але знаходзіцца пад часовай абаронай Камітэта ААН па правах чалавека, які разглядае яго скаргу на адмову грузінскіх уладаў у прытулку.

Як паведаміў “Позірку” Кісляк, 8 лістапада да пікета далучыліся мясцовыя праваабаронцы.

“З калегамі мы пратэстуем супраць дэпартацыі беларуса ў Беларусь, дзе яму пагражаюць катаванні і жорсткае абыходжанне. Гэта была тэрміновая акцыя, за гадзіну я папярэдзіў паліцыю, і мы правялі яе каля Дэпартамента міграцыі МУС з грузінскімі і беларускімі нацыянальнымі сцягамі. Мы казалі праз мегафон пра недапушчальнасць дэпартацыі, а таксама ўключалі песню групы “Ляпіс Трубяцкі” “Воіны святла”, “Марсельезу”, — распавёў Кісляк.

9 лістапада ён зноў выйшаў на пікет, а грузінскія калегі былі на судзе ў беларуса. Паводле яго Кісляка, ва ўсіх выпадках прыязджала паліцыя, сачыла за акцыяй, усё прайшло спакойна. Ахова дэпартамента акуратна зняла з плота грузінскі сцяг, які знесла ветрам.

“Спадзяюся, Дэпартамент міграцыі пачуў нашы довады пра тое, што недапушчальна дэпартаваць палітычных беларусаў у Беларусь. Мы гэта даносім юрыдычным шляхам, шляхам абскарджання гэтага арышту. І на грамадскім узроўні, праз такія акцыі, хочам дамагчыся таго ж”, — падкрэсліў праваабаронца.

Паводле яго слоў, пакуль улады адмоўчваюцца. “Гэта ўжо становіцца традыцыяй. Чымсьці Беларусь нагадвае, калі мы нешта патрабавалі і ніхто ў адказ ніякую пазіцыю не прагаворваў: да нас не выходзілі, у сродках масавай інфармацыі або сацыяльных сетках маўчалі”, — адзначыў Кісляк.

Ён заявіў, што дэпартацыя на радзіму беларусаў, якія з’ехалі праз палітычны пераслед, недапушчальная, і абяцае даносіць гэта на ўсіх узроўнях.

Кісляк мае намер працягнуць пікеты, тым ліку з удзелам мясцовых праваабаронцаў.

Як паведамляў “Позірк”, 9 лістапада суд арыштаваў беларуса на тры месяцы. Яго імя з меркаванняў бяспекі праваабаронцы не называюць.

Гл. падрабязней перадгісторыю:

Беларус, затрыманы ў Тбілісі з пратэрмінаванымі дакументамі, арыштаваны на тры месяцы