У польскай Гдыні беларус працаваў таксістам пасля анулявання права на кіраванне аўтамабілем
10 лістапада, Позірк. У Гдыні выяўлены 42-гадовы грамадзянін Беларусі, які працаваў таксістам пасля таго, як улады павета сваім рашэннем анулявалі яго права на кіраванне транспартнымі сродкамі, вынікае з інфармацыі паліцыі Паморскага ваяводства Польшчы.
Адзначаецца, што супрацоўнікі дарожнай паліцыі спынілі “Таёту Прыус” на вул. Шлёнскай за парушэнне правілаў выкарыстання аўтамабільных светлавых прыбораў.
Пры праверцы па паліцэйскіх базах высветлілася, што ў кіроўцы раней было адкліканае права на кіраванне аўтамабілем — за перавышэнне дапушчальнага ліміту ў 24 штрафныя балы. Нягледзячы на гэта, мужчына працягваў перавозіць пасажыраў у якасці таксіста.
Аўтамабіль эвакуяваны на ахоўную стаянку. Далейшы лёс беларуса вырашыць суд.
Паліцыя нагадала, што кіраванне насуперак прынятаму ўпаўнаважаным органам рашэнню аб адкліканні права на кіраванне аўтамабілем з’яўляецца крымінальным злачынствам. Згодна з арт. 180а КК Польшчы, за гэта прадугледжаныя штраф, абмежаванне альбо пазбаўленне волі на тэрмін да 2 гадоў.
