У Бярозаўскім раёне ў ДТЗ загінуў пасажыр бяспраўніка, кіроўца хаваўся

9 лістапада, Позірк. Аб гібелі 30-гадовага пасажыра легкавога аўтамабіля Audi у ДТЗ у Бярозаўскім раёне паведаміла УУС Брэсцкага аблвыканкама.

Як гаворыцца ў рэлізе, 8 лістапада каля 22:52 гадзін 34-гадовы жыхар раёна, які не мае права кіравання транспартным сродкам, ехаў на аўто па вул. Піянерскай у аг. Спорава, дзе паблізу дома 32 “не выбраў бяспечную хуткасць руху, не справіўся з кіраваннем транспартнага сродку і ўчыніў наезд на апору ЛЭП”.

30-гадовы пасажыр, які знаходзіўся на заднім сядзенні, памёр на месцы. 23-гадовы пасажыр, які знаходзіўся на пярэднім сядзенні, не пацярпеў.

Кіроўца уцёк з месца ДТЗ, аднак неўзабаве быў затрыманы супрацоўнікамі міліцыі.

Распачата крымінальная справа паводле ч. 2 арт. 317 КК (парушэнне правілаў дарожнага руху або эксплуатацыі транспартных сродкаў, якое пацягнула па неасцярожнасці смерць чалавека або прычыненне цяжкага цялеснага пашкоджання).

Ведамства нагадала, што пры ўчыненні ДТЗ вадзіцель абавязаны заставацца на месцы, аказаць дапамогу пацярпеламу, не перамяшчаць транспартны сродак і прадметы, якія маюць дачыненне да здарэння, паведаміць аб тым, што адбылося ў міліцыю і хуткую дапамогу.