За тры кварталы 2026 года 16 грамадзян Беларусі папрасілі Расію прызнаць іх уцекачамі
9 лістапада, Позірк. У студзені — верасні 2026 года 16 грамадзян Беларусі звярнуліся з просьбай прызнаць іх у Расіі ўцекачамі, паведамляе агенцтва ТАСС, абапіраючыся на вывучаныя матэрыялы Міністэрства ўнутраных спраў РФ.
Пра прычыны такога выбару беларускіх грамадзян, а таксама пра рашэнні, прынятыя расійскімі ўладамі, не паведамляецца.
Адзначаецца, што за тры кварталы замежнікі агулам падалі 193 такія заявы — на 15% менш, чым за аналагічны перыяд 2025-га (227).
Ад грамадзян Украіны паступіла 52 хадайніцтвы, Узбекістана — 43, Таджыкістана — 21, Сірыі — 10, Арменіі і Казахстана — па 8, Азербайджана — 7, Малдовы і Туркменістана — па 5, Грузіі і Кыргызстана — па 4. Па адной заяве паступіла ад грамадзян Босніі і Герцагавіны, Італіі, Кеніі, Латвіі, Сербіі, Судана, Швецыі ды іншых краін.
Раней прэс-служба Пастаяннага камітэта Саюзнай дзяржавы паведамляла, што грамадзяне Беларусі і Расіі змогуць знаходзіцца на тэрыторыі іншай з краін без абмежавання тэрміну. Адзначалася, што змены прадугледжаныя пратаколам да пагаднення паміж краінамі аб забеспячэнні роўных правоў грамадзян у галіне свабоды перамяшчэння, выбару месца знаходжання і жыхарства.
Пры знаходжанні больш за 90 сутак патрабуецца рэгістрацыя. Пратакол таксама прадугледжвае магчымасць атрымання дазволу на часовае пражыванне ў іншай краіне на падставе грамадзянства аднаго з бакоў. Пры гэтым на грамадзян Беларусі не будзе распаўсюджвацца кватаванне пры атрыманні дазволу на часовае пражыванне ў РФ.
