Адзін з пастаўшчыкоў паслуг хостынгу для сайтаў дзяржорганаў заявіў пра масавую кібератаку

10 лістапада, Позірк. Інфраструктура беларускага воблачнага правайдара ТАА “Актыўныя тэхналогіі” (працуе пад брэндам ActiveCloud) зазнала масавую кібератаку.

Атака пачалася 10 лістапада ў 3:30, паведаміў правайдар у сваім тэлеграм-канале. Зафіксаваныя парушэнні ў працы абароненага воблачнага хостынгу E-Cloud Protected (у Беларусі), паштовага сэрвісу SmartMail (у Беларусі і Расіі), сайтаў ActiveCloud.

Акрамя таго, недаступныя чаты, тэлефанія і тыкетная сістэма (раздзел “Падтрымка” ў асабістым кабінеце).

Адзначаецца, што тэхнічныя спецыялісты працуюць над ліквідацыяй наступстваў атакі і аднаўленнем штатнай працы закранутых сэрвісаў.

ТАА “Актыўныя тэхналогіі” з’яўляецца адным з сямі пастаўшчыкоў інтэрнэт-паслуг, упаўнаважаных аказваць паслугі хостынгу афіцыйных інтэрнэт-сайтаў і электроннай пошты.

Праведзены “Позіркам” аналіз загаду Аператыўна-аналітычнага цэнтра (ААЦ) № 92 ад 17 снежня 2010 года і яго наступных карэктаванняў паказаў, што ў гэты спіс апрача “Актыўных тэхналогій” уваходзяць мабільны аператар А1, “Белтэлекам”, “Беларускія воблачныя тэхналогіі”, “Надзейныя праграмы”, Нацыянальны цэнтр электронных паслуг і Галоўнае гаспадарчае ўпраўленне Кіраўніцтва справамі прэзідэнта.

У рамках агульных патрабаванняў да правайдараў усе згаданыя арганізацыі абавязаныя размяшчаць абсталяванне, якое яны выкарыстоўваюць, выключна на тэрыторыі Беларусі; прымяняць сертыфікаваныя на нацыянальным узроўні сродкі абароны інфармацыі; мець план бесперабойнай працы і аднаўлення сістэм на выпадак аварыі, атак, збояў ды іншых няштатных сітуацый; перадаваць у ААЦ сярод іншага звесткі пра абанентаў і сэрвісы, справаздачыцца перад цэнтрам пра абароненасць уласных сістэм ды інш.