У жыхара Мінска знойдзена звыш кілаграма марыхуаны, грыбоў і ЛСД — распачатая крымінальная справа

21 верасня, Позірк. 46-гадовага жыхара Мінска затрымалі за незаконны абарот наркотыкаў супрацоўнікі наркакантролю Фрунзенскага РУУС, паведаміла 21 верасня прэс-служба ГУУС Мінгарвыканкама.

Адзначаецца, што дома ў мужчыны было знойдзена каля 1.100 грамаў “гатовай да ўжывання” марыхуаны, чатыры гаршкі з каноплямі, 30 г псілацыбінавых грыбоў, 20 марак ЛСД і прыстасаванні для курэння.

“Мужчына прызнаўся, што псіхатропныя грыбы і каноплі вырошчваў дома для ўласнага ўжывання, для гэтых жа мэтаў набыў у наркамаркеце і забраў у закладцы маркі ЛСД, — гаворыцца ў паведамленні. — Вядома, што мужчына афіцыйна не працаўладкаваны і жыў за кошт разавых падпрацовак, раней у поле зроку міліцыі не трапляў”.

Распачатая крымінальная справа. Сілавікі правяраюць датычнасць мужчыны да “распаўсюду наркатычных сродкаў”.