АПК: 25 сакавіка — гэта Дзень Волі, а не час інаўгурацыі нелегітымнага рэжыму

20 сакавіка, Позірк. “25 сакавіка — гэта Дзень Волі, а не дзень рытуалу нелегітымнага рэжыму”, — гаворыцца ў апублікаванай 20 сакавіка заяве Аб’яднанага пераходнага кабінета (АПК) з нагоды прызначэння даты інаўгурацыі Аляксандра Лукашэнкі.

Правядзенне інаўгурацыі 25 сакавіка — гэта “не толькі дэманстрацыя пагарды да нацыянальных сімвалаў, але і чарговая спроба рэжыму сфарміраваць свой інфармацыйны парадак дня”, адзначае АПК.

“Аўтарытарны рэжым мэтанакіравана выкарыстоўвае стратэгію контрпраграмавання для перакрыцця гістарычна значных падстаў і каштоўнасных арыенціраў у беларускім грамадстве”, — падкрэсліваецца ў заяве.

“Гэты метад не новы і ўжо неаднаразова выкарыстоўваўся ў прапагандысцкіх кампаніях. Але дата 25 сакавіка і яе сутнасць не можа быць сцёртая з нацыянальнай памяці ні рэпрэсіямі, ні прапагандай”, — адзначае кабінет.

Заяўляецца, што “ні так званыя выбары, якія папярэднічалі гэтай “інаўгурацыі”, ні сама цырымонія не маюць ніякай юрыдычнай або палітычнай значнасці для беларускага грамадства і міжнароднай супольнасці”.

“Гэтыя падзеі ўспрымаюцца выключна як элемент аўтарытарнай дэкарацыі, дзе галоўны глядач у зале — вузкае кола Лукашэнкі, якое падзяляе адказнасць за яго злачынствы. Гэта не палітычны акт, а механічнае паўтарэнне рытуалу, якое мае на мэце захаваць лаяльнасць у сістэме, якая ўсё больш залежыць ад рэпрэсій і падтрымкі з боку Масквы”, — гаворыцца ў заяве.

На думку членаў АПК, на гэтым фоне “абсурдна выглядаюць нядаўнія заявы Лукашэнкі пра нібыта гатоўнасць да аднаўлення даверу з Захадам”.

Сцвярджаецца, што калі б “сапраўды існавала зацікаўленасць улады ў дыялогу з Захадам”, то “першымі крокамі павінны былі б стаць канкрэтныя дзеянні: спыненне рэпрэсій, вызваленне ўсіх палітвязняў, вяртанне магчымасцяў для дзейнасці незалежных медыя і арганізацый грамадзянскай супольнасці, адмова ад палітычна матываванага пераследу беларусаў унутры краіны і за яе межамі, а таксама спыненне саўдзелу ў агрэсіі супраць Украіны”.

“25 сакавіка — дзень, які аб’ядноўвае беларусаў вакол ідэі свабоды і нацыянальнай годнасці, незалежна ад таго, дзе яны знаходзяцца. Лукашэнка і яго асяроддзе сыдуць у мінулае, а Беларусь застанецца і будзе жыць вечна. Заклікаем усіх беларусаў святкаваць Дзень Волі і ў Беларусі, і ва ўсім свеце. Жыве Беларусь!” — заяўляе АПК.

Сёмая інаўгурацыя Аляксандра Лукашэнкі пройдзе 25 сакавіка.

Мінулая інаўгурацыя адбылася 23 верасня 2020 года, у разгар масавых пратэстаў пасля выбараў 9 жніўня. Мерапрыемства было арганізаванае ў абстаноўцы сакрэтнасці, пра яго не паведамлялася загадзя і на яго былі запрошаны толькі набліжаныя да Лукашэнкі людзі.

У дзень інаўгурацыі па краіне пракацілася хваля затрыманняў, у цэнтр Мінска традыцыйна для тых дзён была сцягнутая спецыяльная тэхніка, АМАП і ўнутраныя войскі. Днём беларусы выходзілі на пікеты, тады ж здарыліся першыя затрыманні, яны працягнуліся ўвечары, калі вялікая колькасць людзей сабралася каля стэлы “Мінск — горад-герой“. У той дзень сілавікі палівалі пратэстоўцаў афарбаванай у аранжавы колер вадой з вадамётаў, выкарыстоўвалі светлашумавыя гранаты і распылялі газ, праводзілі жорсткія затрыманні, праваабаронцы паведамлялі пра сотні затрыманых.

Вынікі выбараў 2020 года не былі прызнаныя міжнароднай супольнасцю, якая лічыць абраным прэзідэнтам (прэзідэнт-элект) дэмакратычнага лідара Святлану Ціханоўскую. У дачыненні да рэжыму Лукашэнкі за рэпрэсіі былі ўведзеныя санкцыі.

25 сакавіка дэмакратычна настроеная частка насельніцтва Беларусі святкуе Дзень Волі — гадавіну абвяшчэння Беларускай Народнай Рэспублікі (БНР) у 1918 годзе.

У Беларусі гэтая дата афіцыйна не адзначаецца. Пасля прэзідэнцкіх выбараў 2020 года любыя спробы публічна адзначыць Дзень Волі багатыя затрыманнямі і наступнымі судамі, як мінімум па адміністрацыйных абвінавачваннях. Гістарычныя падзеі, звязаныя з БНР, паслядоўна дэманізуюцца дзяржпрапагандай. Нацыянальныя сімвалы абвешчаныя “калабарацыянісцкімі“, “нацысцкімі” і фактычна абвешчаныя па-за законам. Значэнне БНР для беларускай дзяржаўнасці лічыцца перабольшаным, а сама рэспубліка пазіцыянуецца як “марыянеткавае“ стварэнне створанае пад германскім пратэктаратам у завяршальнай фазе Першай сусветнай вайны.