Лукашэнка абмеркаваў з Рыжанковым “аднаўленне даверу” з Захадам
18 сакавіка, Позірк. Тэма “аднаўлення даверу” з Захадам сярод іншага была ўзнятая на сустрэчы Аляксандра Лукашэнкі з міністрам замежных спраў Максімам Рыжанковым 18 сакавіка ў Мінску, вынікае са слоў апошняга.
“З кіраўніком дзяржавы таксама быў абмеркаваны шэраг пытанняў па рэалізацыі нейкіх нашых крокаў і крокаў нашых партнёраў па аднаўленні даверу ў стасунках. Гэта тычылася ў тым ліку і шэрагу заходніх дзяржаў”, — цытуюць кіраўніка знешнепалітычнага ведамства дзяржСМІ.
Якія менавіта пытанні абмяркоўваліся ў гэтым кантэксце, міністр па выніках сустрэчы не ўдакладніў.
Лукашэнка і Рыжанкоў таксама абмеркавалі “прапрацоўку візітаў”, “рэалізацыю планаў па развіцці супрацы”, у тым ліку з Кітаем, працу ў рамках Еўразійскага эканамічнага саюза (ЕАЭС) і падрыхтоўку да правядзення ў траўні саміта ЕАЭС у Мінску.
Падчас сустрэчы было заяўлена, што Лукашэнка плануе правесці нараду з беларускімі амбасадарамі.
24–26 лютага беларуская ўрадавая дэлегацыя ўдзельнічала ў “сегментах высокага ўзроўню” 58-й сесіі Савета ААН па правах чалавека (СПЧ) і Канферэнцыі па раззбраенні. З трыбуны ў Жэневе (Швейцарыя) Рыжанкоў абвінаваціў краіны Захаду ў парушэнні норм і прынцыпаў ААН, заклікаў “правесці глабальную перазагрузку ў сферы правоў чалавека”, а таксама запрасіў у Беларусь вярхоўнага камісара ААН па правах чалавека.
Еўрапейскі саюз не прызнае Лукашэнку легітымным прэзідэнтам Беларусі. ЕС увёў у дачыненні да прадстаўнікоў яго рэжыму санкцыі — як за ўнутраныя рэпрэсіі, так і за дапамогу Расіі ў яе агрэсіі супраць Украіны.
У сваю чаргу ўрад Беларусі ўвесну 2022 года зацвердзіў пералік “замежных дзяржаў, што здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб”, у які ўваходзяць усе краіны ЕС.
