Мінск 09:18

Цягам 12 дзён у Беларусі будуць больш пільна кантраляваць перавозчыкаў пасажыраў і грузаў

Архіўнае відэа: прэс-служба МУС / стоп-кадр: "Позірк"

16 лістапада, Позірк. Прафілактычныя мерапрыемствы, скіраваныя на “прадухіленне ДТЗ з удзелам транспарту, які ажыццяўляе перавозкі пасажыраў і грузаў”, пройдуць “у рамках узмоцненага варыянту нясення службы з 16 па 27 лістапада”, паведамляе прэс-служба Міністэрства ўнутраных спраў.

Адзначаецца, што супрацоўнікі Дзяржаўтаінспекцыі нададуць асаблівую ўвагу “выкананню кіроўцамі вызначанага рэжыму працы і адпачынку”.

“Сумесна з прадстаўнікамі Транспартнай інспекцыі Міністэрства транспарту і камунікацый на аўтадарогах будуць арганізаваныя рэйдавыя мерапрыемствы па выяўленні парушэнняў парадку допуску да перавозак і кантролі за тэхнічным станам транспартных сродкаў, — гаворыцца ў паведамленні. — Пры выяўленні парушэнняў вызначанага рэжыму працы і адпачынку, а таксама эксплуатацыі транспарту да кіроўцаў і кіраўнікоў транспартных арганізацый будуць выкарыстоўваццва самыя строгія захады рэагавання”.

МУС канстатавала, што “стомленасць, ператамленне і зніжэнне канцэнтрацыі ўвагі за стырном значна павялічваюць рызыку здзяйснення ДТЗ з трагічнымі наступствамі”.

Меры па “кардынальным узмацненні кантролю за выкананнем перавозчыкамі заканадаўства ў сферы падтрымання бяспекі дарожнага руху”, якія Дзяржаўтаінспекцыя прыме сумесна з Транспартнай інспекцыяй Мінтранса ды “іншымі зацікаўленымі ведамствамі”, начальнік галоўнага ўпраўлення ДАІ МУС Віктар Ротчанкаў анансаваў 14 лістапада пасля аварыі, якая адбылася ў той дзень у Старадарожскім раёне Мінскай вобласці (мікрааўтобус сутыкнуўся з грузавіком — трое загінулых), і напярэдадні — у Жыткавіцкім раёне Гомельскай вобласці (грузавік сутыкнуўся з маршруткай, 10 пасажыраў, уключаючы траіх дзяцей, даставілі ў бальніцу).

Ужо пасля гэтага ў Мінскім раёне сутыкнуліся мікрааўтобус і легкавы аўтамабіль, якія рухаліся ў адным кірунку. Кіроўца легкавога аўтамабіля загінуў, яго пасажыр і 14 пасажыраў маршруткі атрымалі траўмы рознай ступені цяжкасці.

Падзяліцца: