На інаўгурацыю Лукашэнкі запрошана больш за 1.100 чалавек
Картэж Лукашэнкі па дарозе на шостую інаўгурацыю (23 верасня 2020 года)
24 сакавіка, Позірк. На цырымонію інаўгурацыі Аляксандра Лукашэнкі запрошана больш за 1.100 чалавек, паведамляе неафіцыйны тэлеграм-канал яго прэс-службы.
Мерапрыемства пачнецца апоўдні 25 сакавіка, картэж Лукашэнкі праедзе па праспектах Незалежнасці і Пераможцаў. На асобных участках гэтых праспектаў, паводле інфармацыі ДАІ, з 11:00 да 13:30 “будзе ўводзіцца кароткачасовае абмежаванне руху ўсіх відаў транспарту, уключна з грамадскім”.
Мінулая інаўгурацыя адбылася 23 верасня 2020 года, у разгар масавых пратэстаў пасля выбараў 9 жніўня. Мерапрыемства было арганізаванае ў абстаноўцы сакрэтнасці, пра яго не паведамлялася загадзя і на яго былі запрошаныя толькі набліжаныя да Лукашэнкі людзі.
У дзень інаўгурацыі па краіне пракацілася хваля затрыманняў, у цэнтр Мінска традыцыйна для тых дзён была сцягнута спецыяльная тэхніка, АМАП і ўнутраныя войскі. Удзень людзі збіраліся на пікеты, увечары прайшла акцыя пратэсту, якую падаўлялі пры дапамозе вадамётаў, святлошумовых гранат і слёзатачывага газу. Праваабаронцы паведамлялі пра сотні затрыманых.
Вынікі выбараў 2020 года не былі прызнаныя міжнароднай супольнасцю, якое лічыць абраным прэзідэнтам (прэзідэнт-элект) дэмакратычнага лідара Святлану Ціханоўскую. У дачыненні да рэжыму Лукашэнкі за рэпрэсіі былі ўведзеныя санкцыі.
25 сакавіка дэмакратычна настроеная частка насельніцтва Беларусі святкуе Дзень Волі – гадавіну абвяшчэння Беларускай народнай рэспублікі (БНР) у 1918 годзе.
На электаральнай працэдуры 26 студзеня, якую афіцыйны Мінск лічыць “прэзідэнцкімі выбарамі”, за Лукашэнку, паводле сцвярджэння Цэнтрвыбаркама, прагаласавала 86,82% выбаршчыкаў.
Працэдура прайшла пад поўным кантролем уладаў і на фоне беспрэцэдэнтнага ўзроўню рэпрэсій, Лукашэнка не быў прызнаны міжнароднай супольнасцю легітымным прэзідэнтам.
“Інаўгурацыя без выбараў — пустая фармальнасць, яна не зробіць Лукашэнку легітымным”, — заявіла “Позірку” Ціханоўская, каментуючы паведамленні пра прызначэнне інаўгурацыі Лукашэнкі на 25 сакавіка.
“Яго не прызнаюць ні беларусы, ані міжнародная супольнасць, — падкрэсліла дэмакратычны лідар. — Яго рэжым працягвае трымацца выключна на рэпрэсіях, страху і падтрымцы Крамля, прадаючы суверэнітэт нашай краіны ў абмен на падтрымку сваёй незаконнай улады”.