Кіраўнік МЗС Польшчы Сікорскі абмяркоўваў у ЗША тэму вызвалення беларускага палітвязня Пачобута

28 сакавіка, Позірк. Падчас апошняга візіту ў Вашынгтон міністр замежных справаў Польшчы Радослаў Сікорскі “асабіста вёў перамовы” пра вызваленне беларускага палітвязня, журналіста, актывіста неафіцыйнага Саюза палякаў Анджэя Пачобута, вынікае з інфармацыі wiadomosci.wp.pl.

“Калі б усё залежала ад мяне, Анджэй Пачобут, вядома, быў бы на волі”, — цытуе медыя кіраўніка польскага знешнепалітычнага ведамства. Аднак, падкрэсліў чыноўнік, палітвязень “знаходзіцца ва ўладзе аўтарытарнага рэжыму”.

Сікорскі не стаў удакладняць з кім менавіта абмяркоўваў гэтую тэму, а таксама прыводзіць іншыя падрабязнасці: “Давайце дазволім перамоўшчыкам дзейнічаць абачліва”.

Кіраўнік МЗС Польшчы знаходзіўся з візітам у ЗША напрыканцы лютага.

21 лютага Міжнародная праваабарончая арганізацыя PEN International запатрабавала неадкладна вызваліць Пачобута.

16 студзеня падчас наведвання Мінскага гарадскога тэхнапарку Аляксандр Лукашэнка заявіў, што Варшава “адмовілася ад Пачобута”, “адмовіліся весці нават размовы па Пачобуту”. Ён сцвярджаў, што журналіст “не хоча туды ехаць — вось і ўсё пытанне”.

Пасля вынясення палітычна матываванага выраку Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (Бераставіца). Паводле неафіцыйнай інфармацыі, журналіст адмовіўся пісаць прашэнне аб памілаванні.

30 кастрычніка 2024 года Сікорскі падчас выступу ў Сенаце заявіў, што Варшава “па розных каналах” дамагаецца вызвалення суайчыннікаў, якія знаходзяцца ў беларускіх турмах, асаблівая ўвага надаецца Пачобуту, “прыгаворанаму па фіктыўнай справе да васьмі гадоў калоніі”.

29 жніўня кіраўнік МЗС Польшчы паведаміў, што для вызвалення журналіста Варшава “спрабуе розныя ідэі”. Чыноўнік выказаў надзею, што “адна з іх нарэшце спрацуе”.

Прэзідэнт Польшчы Анджэй Дуда 24 жніўня 2023 года заявіў, што Варшава працягвае працу па вызваленні Пачобута.