Туск заклікаў патэнцыйных нелегальных мігрантаў не верыць Лукашэнку і Пуціну

4 красавіка, Позірк. Польшча найбліжэйшым часам плануе пачаць інфармацыйную кампанію ў сямі краінах, адкуль у краіну прыбывае больш за ўсё нелегальных мігрантаў, паведаміў на сваёй старонцы ў сацсетцы Х польскі прэм’ер-міністр Дональд Туск.

Ён заклікаў патэнцыйных нелегальных мігрантаў не давяраць пасярэднікам, якія абяцаюць дапамогу ў перасячэнні беларуска-польскай мяжы.

“Не верце Лукашэнку, не верце Пуціну, — таксама заклікаў Туск. — Яны падманваюць вас, калі кажуць, што вы патрапіце гэтым шляхам у Еўропу. Гэта няпраўда. Тут вы больш не можаце папрасіць прытулку і найперш — не зможаце перасекчы мяжу нелегальна”.

Паводле слоў прэм’ера, “кожны метр” усходняй мяжы Польшчы надзейна ахоўваецца, “працуюць камеры і дроны”.

2 красавіка Польшча зафіксавала 180 спроб незаконнага перасячэння мяжы з боку Беларусі. “Больш за 150 з іх былі прадухіленыя, — паведаміла памежная служба краіны. — У дачыненні да 28 чалавек праводзяцца мерапрыемствы па затрыманні. За спрыянне затрымана чатыры чалавекі. У бок польскіх патрулёў кідалі камяні і галлё”.

З пачатку года, паводле падлікаў “Позірку”, Польшча спыніла каля 3,9 тыс. спроб незаконнага перасячэння мяжы з беларускай тэрыторыі. Дэталёвы аналіз абцяжараны ў сувязі з тым, што Памежная ахова Польшчы ў апошнія месяцы публікуе прыблізныя лічбы, якія разыходзяцца са звесткамі іншых краін Еўрасаюза, суседніх з Беларуссю.

За 2024 год Літва, Латвія і Польшча прадухілілі 36,3 тыс. спроб незаконнага пранікнення мігрантаў з беларускай тэрыторыі.

Міграцыйны крызіс на мяжы Беларусі і краін Еўрасаюза працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, бо іх туды “паклікалі”.