За суткі на пажарах загінула два чалавекі, але на статыстыцы МНС гэта зноў не адбілася

5 красавіка, Позірк. За мінулыя дзяжурныя суткі (з 6:00 4 красавіка па 6:00 5 красавіка) агонь у Беларусі забраў два жыцці, вынікае з аператыўнай зводкі Міністэрства па надзвычайных сітуацыях.

Трагедыі адбыліся ў Старадарожскім раёне Мінскай вобласці і Горацкім раёне Магілёўскай вобласці.

Паводле даных МНС, ад пачатку года на тэрыторыі краіны адбылося 2.077 пажараў (за аналагічны перыяд 2024-га — 1.519), на якіх загінула 220 чалавек (167; +31,7%).

Разам з тым днём раней, 4 красавіка, у табліцы, якую ведамства абнаўляе штодня, фігуравала тая ж колькасць — 220 загінулых. Такім чынам, апошнія смерці ў ёй не ўлічаныя.

“Позiрк” ужо не раз звяртаў увагу на тое, што МНС перыядычна карэктуе статыстыку смяротнасці на пажарах у бок змяншэння.

У Беларусі фіксуецца “сур’ёзная праблематычная сітуацыя” з гібеллю людзей на пажарах, заявіў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.

“Вельмі сур’ёзны рост, такі непрыемны рост [колькасці загінуўшых]”, — сказаў ён.

Асноўная прычына, з якой павялічваецца колькасць пажараў, — неасцярожнае абыходжанне з агнём, у першую чаргу звязанае з паленнем у стане алкагольнага ап’янення, адзначыў прадстаўнік МНС.