Кіраўнік Рассупрацоўніцтва заявіў, што беларуская моладзь “уганяецца” ў Польшчу за атрыманнем адукацыі

7 красавіка, Позірк. Пра вялікую колькасць беларускіх выпускнікоў, якія адпраўляюцца вучыцца ў Польшчу, заявіў 7 красавіка кіраўнік Федэральнага агенцтва па справах СНД, суайчыннікаў, якія пражываюць за мяжой, і па міжнародным гуманітарным супрацоўніцтве РФ (Рассупрацоўніцтва) Яўген Прымакоў.

Паводле яго слоў, якія перадае расійскае агенцтва Sputnik, беларуская моладзь,“па сутнасці, уганяецца ў Польшчу, каб атрымліваць адукацыю там”. “І ўжо сапраўды [гэтыя маладыя людзі] ніяк не думаюць, на жаль, аб вяртанні ў Беларусь”, — сказаў чыноўнік.

Для Беларусі, адзначыў ён, “значна больш хваравіты” заходні кірунак адтоку моладзі, чым паступленне выпускнікоў у расійскія ВНУ. Хоць, паводле слоў Прымакова, у Маскве “бачаць сур’ёзную занепакоенасць беларускіх сяброў вялікай квотай для навучання ў Расіі і адтокам туды маладых людзей”.

“Мы як раз выступаем за тое, каб рабяты, якія паехалі вучыцца ў Расію, абавязкова вярталіся ў Беларусь і рабілі сваю краіну яшчэ больш квітнеючай і выдатнай”, — заявіў кіраўнік Рассупрацоўніцтва.

Расійскі бок, паводле яго сцвярджэння, гатовы абмяркоўваць мэтавыя квоты на адукацыю ў РФ, каб, “адвучыўшыся па запатрабаваных у Беларусі спецыяльнасцях”, маладыя людзі вярталіся на радзіму з гарантыяй працаўладкавання.

У Расіі ёсць квота на навучанне за кошт бюджэту беларускіх грамадзян. У 2024 годзе яна склала 1,3 тыс. месцаў (без змен у параўнанні з 2023-м). Паводле звестак Мінадукацыі РФ, беларусы, якія паступілі паводле квоты, маюць права на стыпендыю і месца ў інтэрнаце. Абавязковага размеркавання выпускнікоў у расійскіх ВНУ няма.

У 2023 годзе ў расійскія ВНУ паступіла 2.166 грамадзян Беларусі, гэта 7% ад колькасці ўсіх замежных абітурыентаў Расіі.

Да высновы, што асноўнымі напрамкамі студэнцкай эміграцыі беларусаў застаюцца Расія і Польшча, прыйшлі аўтары даследавання, праведзенага інстытутам “Палітычная сфера”. Паводле даных даследавання, прывабнасць заходнееўрапейскай адукацыі для беларускіх абітурыентаў вельмі вялікая, і цікавасць працягвае расці нягледзячы на тое, што адносіны Беларусі з суседнімі краінамі за апошнія гады значна пагоршыліся. Калі ў 2013 годзе ў Еўропе вучылася каля 10 тыс. студэнтаў з Беларусі, то ў 2023-м іх было больш за 18 тыс. Заахвочвальнымі матывамі для выезду даследчыкі назвалі палітычны крызіс 2020 года ў Беларусі і пачатак поўнамаштабнай вайны Расіі супраць Украіны ў 2022-м.

Рассупрацоўніцтва, якое працуе ў 62 краінах (73 прадстаўніцтвы), называе сваёй місіяй “узмацненне гуманітарнага ўплыву Расіі ў свеце”. У рэальнасці ж яго аддзяленні займаюцца прапагандай палітыкі Крамля і сярод іншага распаўсюджваннем наратываў, якія апраўдваюць агрэсію ва Украіне.

Так, Рассупрацоўніцтва было партнёрам фотавыставы аб “злачынствах кіеўскага рэжыму”, якая ў студзені 2024 года адкрылася ў мінскім філіяле Расійскага дзяржаўнага сацыяльнага ўніверсітэта. Пад яго эгідай у Беларусі працуе чатыры Расійскія цэнтры навукі і культуры (РЦНК) або “Рускія дамы”: у Гродне, Брэсце, Гомелі і Мінску.

У канцы лістапада генеральны консул РФ у Гродне Феадосій Уладышэўскі сустракаўся з кадэтамі з так званай “данецкай народнай рэспублікі” ў “Рускім доме” ў Гродне.

Намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення Павел Латушка ў апублікаваным 2 траўня 2024 года відэазвароце назваў Рассупрацоўніцтва адным з афіцыйны інструментаў расійскай “мяккай сілы”. Паводле яго слоў, яно было створана для рэалізацыі палітыкі РФ з дапамогай укаранення ідэй “рускага свету” за мяжой, у тым ліку ў Беларусі.

У аналітычнай запісцы, падрыхтаванай у 2024 годзе Расійскім інстытутам стратэгічных даследаванняў (РІСД), апублікаванай расследавальным медыя “Бюро” ў лістападзе, гаварылася, што ў інтарэсах Расіі фармаванне гістарычнай самасвядомасці беларусаў як прадстаўнікоў адной з рускімі цывілізацыі, а не як тых, хто жыве “паміж Усходам і Захадам”.