Славакія заблакавала ўвядзенне санкцый супраць малодшай нявесткі Лукашэнкі — СМІ

8 красавіка, Позірк. Прапанову Літвы аб уключэнні ў санкцыйны спіс Еўрасаюза кандыдатуры Ганны Лукашэнкі, жонкі сярэдняга сына Аляксандра Лукашэнкі — Дзмітрыя, заблакавала Славакія, гаворыцца ў матэрыяле журналістаў-расследавальнікаў праекта “Бюро” ад 8 красавіка.

Адзначаецца, што яна “адзіная з уплывовага беларускага сямейства, хто не трапіў пад санкцыі ЕС”. У спісе, акрамя Аляксандра і Дзмітрыя Лукашэнкаў, знаходзіцца і ягоны старэйшы сын Віктар з жонкай Ліліяй.

“Бюро” нагадвае, што Ганна Лукашэнка з’яўляецца генеральным прадзюсарам “Музычнай медыакампаніі”, “якая атрымлівае дзяржаўныя заказы на правядзенне забаўляльных мерапрыемстваў, часта прапагандысцкага характару”. Менавіта яна праводзіла “схаваную перадвыбарчую агітацыйную кампанію Аляксандра Лукашэнкі “Марафон адзінства”.

“Ганна Л. [Ганна Лукашэнка] была прапанаваная Літвой і сапраўды заблакаваная Славакіяй”, — сказаў ананімна еўрапейскі чыноўнік выданню VSquare.org, гаворыцца ў матэрыяле.

У Міністэрствах замежных спраў Літвы і Славакіі не пацвердзілі, але і не абверглі гэтую інфармацыю, адзначае “Бюро”.

“Абмеркаванне прапаноў ЕС па санкцыях адбываецца ў закрытым рэжыме, ацэньваюцца палітычныя і прававыя аспекты санкцыйных ініцыятыў. Калі яны ацэньваюцца як недастатковыя з пункту гледжання іх абароны ў судах ЕС, то такая санкцыйная ініцыятыва адкладаецца”, — адказалі славацкія дыпламаты на запыт мясцовага расследавальніцкага цэнтра Яна Куцяка.

Прэм’ер-міністр Славакіі Роберт Фіца выступае за нармалізацыю адносін з Расіяй і Беларуссю. Ён наведваў Мінск у 2016 годзе і называў Беларусь сяброўскай краінай.

Аднаўленне працы беларуска-славацкай міжпарламенцкай групы сяброўства і перспектывы двухбаковых парламенцкіх візітаў былі абмеркаваныя 3 красавіка на сустрэчы пасла Беларусі ў Аўстрыі і Славакіі па сумяшчальніцтве Андрэя Дапкюнаса з віцэ-спікерам парламента Славакіі Ціборам Гашпарам, паведаміла МЗС Беларусі.

4 красавіка Аляксандр Лукашэнка павіншаваў Фіца “са знамянальнай датай — 80-й гадавінай вызвалення Браціславы ад нацысцкай акупацыі”.

Раней, 1 студзеня, віншуючы Фіца з Днём утварэння Рэспублікі, Лукашэнка, “улічваючы асабістую прыхільнасць” славацкага прэм’ера “захаванню гістарычнай памяці пра подзвіг продкаў”, запрасіў яго “наведаць Мінск і Брэсцкую крэпасць напярэдадні 80-годдзя вялікай перамогі ў маі 2025 года або ў іншы зручны для яго час”.

Згодна з пастановай Савета Міністраў Беларусі ад 6 красавіка 2022 года, Славакія як член Еўрапейскага саюза ўваходзіць у лік замежных дзяржаў, “што здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб”.

Беларусь закрыла амбасаду ў Браціславе восенню 2023 года. Апошнім амбасадарам Беларусі ў Славакіі быў Ігар Ляшчэня, які падаў у адстаўку ў жніўні 2020 года. Тады дыпламат, былы памочнік Лукашэнкі, выступіў у падтрымку беларусаў, якія выйшлі на мірныя пратэсты пасля выбараў прэзідэнта.

Цяперашні ўрад Славакіі адрозніваецца пракрамлёўскай накіраванасцю.