У Магілёўскім раёне завялі справу на загадчыцу ўчастковай бальніцы праз завышэнне колькасці вакцынаваных
10 красавіка, Позірк. Пракуратура Магілёўскага раёна ўзбудзіла крымінальную справу паводле ч. 1 арт. 427 КК (службовы падлог) у дачыненні да загадчыцы адной з участковых бальніц — праз завышэнне колькасці вакцынаваных, паведамляе прэс-служба абласной пракуратуры.
Сцвярджаецца, што яна, “з’яўляючыся службовай асобай, арганізавала занясенне ў журналы прафілактычных прышчэпак і выкарыстання імунабіялагічных лекавых прэпаратаў загадзя фальшывых звестак пра вакцынаванне грамадзян”.
Наглядны орган мяркуе, што загадчыца бальніцы зрабіла такім чынам, каб “пазбегнуць матэрыяльнай і дысцыплінарнай адказнасці за нізкія тэмпы вакцынацыі насельніцтва”.
Справа накіраваная ў Магілёўскі міжраённы аддзел Следчага камітэта для папярэдняга расследавання.
Згодна з Крымінальным кодэксам, ч. 1 арт. 427 прадугледжвае шырокі спектр магчымых санкцый: штраф, пазбаўленне права займаць пэўныя пасады або займацца пэўнай дзейнасцю, папраўчыя работы, абмежаванне або пазбаўленне волі (усё на тэрмін да 2 гадоў).
На пачатку красавіка пракуратура Віцебскай вобласці паведаміла, што суд Чыгуначнага раёна Віцебска прызнаў пецярых медработнікаў вінаватымі ў знішчэнні не менш як 6 тыс. вакцын ад COVID-19 коштам 120 тыс. рублёў. Прадугледжвалася, што гэта было зроблена, каб прадэманстраваць высокія паказчыкі вакцынацыі насельніцтва.
Медыкі былі прыгавораныя да абмежавання волі без накіравання ў папраўчую ўстанову адкрытага тыпу (намеснік загадчыка і старшая медыцынская сястра — на 3,5 года паводле ч. 3 арт. 426 КК — “перавышэнне ўлады або службовых паўнамоцтваў”, тры медсястры — на 2 гады паводле ч. 6 ст. 16 — “саўдзел у злачынстве” — ч. 3 ст. 426).
Паводле звестак тэлеграм-канала “Віцебск, я гуляю!”, гаворка ішла пра намесніцу загадчыка гарадской паліклінікі № 6 Ірыну Кочаву, старшую медсястру Святлану Савіцкую, медсястру Марыну Когаль. Імёны яшчэ двух медсясцёр не называліся.
Гэта ўжо другі прыгавор суда адносна знішчэння вакцын у Віцебску. У 2024 годзе медработніцу асудзілі на 5 гадоў зняволення з адтэрміноўкай на 3 гады — за знішчэнне 4,5 тыс. вакцын.
У 2023 годзе ў Гомелі была заведзеная справа паводле вышэйзгаданага артыкула ў дачыненні да загадчыка аддзялення прафілактыкі адной з паліклінік абласнога цэнтра і старшай медсястры таго ж аддзялення. Тады гаворка ішла пра знішчэнне больш як 92 тыс. доз вакцын коштам каля 2,7 млн рублёў.
Прызначаючы Аляксандра Хаджаева міністрам аховы здароўя 25 студзеня 2024 года, Аляксандр Лукашэнка ў чарговы раз заявіў, што ў сферы аховы здароўя трэба лічыць грошы: “Каб не было так, як у нас было раней у часы пандэміі і пасля: вакцынацыю праводзілі — не праводзілі, недзе ў сметнік гэтыя вакцыны выкінулі, а недзе знішчылі на месцы. Але гэта вялікія грошы. Такія факты былі”.