Ціханоўская: Чалавечнасць і сумленнасць называюць экстрэмізмам толькі тыя, хто на іх няздольны 

10 красавіка, Позірк. Колькі б Лукашэнка і яго паплечнікі ні спрабавалі знішчыць усялякае іншадумства, яны ніколі не навяжуць свой светапогляд людзям, якія шануюць праўду, і ніколі не зламаюць тых, хто працуе для дапамогі і справядлівасці. Так дэмакратычны лідар Святлана Ціханоўская пракаментавала ўключэнне ў спіс “экстрэмістскіх фарміраванняў” праекта журналістаў-расследавальнікаў “БюроМедыя” і ініцыятыву дапамогі жанчынам у палітычным зняволенні “Палітвязынка”.

“Чалавечнасць і сумленнасць называюць экстрэмізмам толькі тыя, хто на іх няздольны”, — падкрэсліла дэмлідар, якую цытуе яе прэс-служба. 

Паводле Ціханоўскай, рэжым зноў і зноў “спрабуе даказаць, што яму пад сілу зняважыць і скасаваць значнасць беларускіх ініцыятываў”, бо гэта яго адзіны спосаб паказаць сваю “ўладу”. 

“Але быць сапраўднай уладай — гэта найперш думаць пра людзей, пра тое, як абараняць, падтрымліваць, гаварыць праўду нават у самых надзвычайных умовах. Ініцыятывы, накшталт “БюроМедыя” і “Палітвязынкі” — менавіта пра гэта. Яны — прыклад таго, як людзі самі, без падтрымкі дзяржавы, робяць важную для беларусаў і беларусак справу”, — адзначыла палітык і падзякавала ўсім, хто працягвае рабіць сваю справу, нягледзячы на рызыкі і ціск. 

9 красавіка стала вядома, што рашэннем Міністэрства ўнутраных спраў і Камітэта дзяржаўнай бяспекі яшчэ пяць праектаў і груп грамадзян прызнаныя “экстрэмісцкімі фарміраваннямі”.

У пералік, апублікаваны на сайце МУС, была ўнесена праваабарончая ініцыятыва па падтрымцы жанчын-палітзняволеных “Палітвязынка”, расследвальніцкі праект “БюроМедыя”, медыяпраект “Хрысціянская візія”, тэлеграм-чат “Магілёўцы abroad” і акаўнт у сацсетцы X (былы “Твітар”) “чё ваще происходит”.